DILI, 19 setembru 22022 (TATOLI)–Prezidente Federasaun Futeból Timor-Leste (FFTL), Francisco Martins da Costa Pereira Jerónimo, hateten, orsamentu atu selu jogadór selesaun nasionál na’in-25 no asistente na’in-lima ne’e mai hosi Federation International Football Association (FIFA).
“Prosesu ne’e iha ona FIFA no osan to’o mai halo pagamentu ona. Ami halo prosesu hotu ona, osan ne’e FIFA nian la’ós ha’u nian, maibé tanba osan ne’e FIFA nian entaun prosesu ne’e tuir regra, ne’ebé ita labele obriga sira, osan iha ha’u-nia gaveta mak ha’u hasai fó ba ne’e buat seluk ida maibé la’ós iha ha’u-nia gaveta, iha federasaun ne’ebé ami submete ba sira hodi halo verifikasaun mak bele hasai osan,” Atuál Ministru Asuntu Parlamentár no Komunikasaun (MAPKOMS) ne’e informa hafoin reuniaun ho Primeiru-Ministru (PM), Taur Matan Ruak, iha Rezidénsia Farol, segunda ne’e.
Notísia relevante: FIFA iha kompromisu apoia dezenvolve futeból Timor-Leste
Nia esplika, kritéria jogadór ne’ebé hetan subsídiu maka bainhira hili jogadór ida mai tama iha treinamentu, ezemplu foti hosi klubu, asosiasaun ka munisípiu sira, bolu sira tama ona iha treinamentu, no bainhira sira-nia naran tama ona iha lista treinamentu hahú iha ne’e tenki fó ona subsídiu.
“Subsídiu ne’ebé fó ba kada loron ho valór mínimu $7 no másimu $15. Jogadór ne’ebé seidauk selu sira-nia subsídiu ne’e mak sira ne’ebé foin lalais ba treinu iha Qatar,” nia akresenta.
Razaun seidauk selu subsídiu jogadór sira tanba prosesu iha FIFA no daudaun mós iha federasaun halo reestruturasaun.
“Maibé atu dehan loloos katak aplika ba fundu ne’e la’ós Timór de’it maibé nasaun barak, ne’ebé ita hein de’it tarde liu fulan-novembru bele halo ona pagamentu,” nia kompromete.
Bainhira husu kona-ba totál orsamentu atu selu jogadór sira ne’e, responsável másimu ne’e la fiksa númeru.
Jornalista : Antónia Gusmão
Editora : Julia Chatarina
