Projetu estrada nasionál Pante Makasar-Oésilo iha ona konkursu públiku
OÉ-CUSSE, 20 setembru 2022 (TATOLI) – Diretór Rejionál Infraestrutura (DRI), iha Rejiaun Administrativa Espesiál Oé-Cusse Ambeno (RAEOA), Candido dos Reis Amaral, fó-sai katak, projetu estrada nasionál hosi sub-rejiaun Pante Makasar liga sub-rejiaun Oésilo iha ona faze konkursu públiku.
“Projetu estrada nasioná hosi Pante Makasar ba Oésilo iha ona konkursu públiku, nia finál mak kompañia rua de’it maka submete ona sira-nia dokumentu, agora ita hein de’it tanba sei iha prosesu check aritmatika, depois ita hatene ona sé mak sai manán-na’in ba projetu ne’e,” KñCandido dos Reis Amaral, hatete iha Oé-Cusse, tersa ne’e.
Diretór Obra Públika ne’e, informa, estrada nasionál ne’e sei hahú hosi eis merkadu Tono, aldeia Noeninen, suku Cunha sei to’o fronteira Napan, suku Bobometo, sub-rejiaun Oésilo ho distánsia kilómetru 18.
Tan ne’e daudaun ne’e nia prosesu to’o ona loke envelope ba avaliasaun finanseira nian, no mós haree fila-fali kona-bá check aritmatika presu ne’ebé sira hato’o mai los ka lae.
“Kompañia rua de’it maka fila-fali mai hatama dokumentu, seluk mai hato’o sira-nia razaun sei la partisipa tanba okupadu ho serbisu seluk, entaun mai hatama dokumentu ne’e, iha bed-opening ne’e só kompañia rua de’it, PT Hutama Karya ho PT Waskita Karya, entaun ita halo avaliasaun ba dokumentu rua ne’e, ita hein katak iha tempu badak ekipa painél bele termina ona sira-nia serbisu hodi submete ba Prezidente Autoridade halo anúnsiu públiku,” nia informa.
Nia fundamenta, estrada ba sub-rejiaun Oésilo ne’e iha foho lolon ne’e serbisu la fasil, entaun ekipa painél no rekizitu ita tau ne’e forte, atu nune’e kompañia ne’ebé mak sai manán-na’in, bele mai ho kondisaun ne’ebé forte.
Jornalista: Abílio Elo Nini
Editór: Evaristo Soares Martins
