EKONOMIA, HEADLINE, INTERNASIONÁL

Autoridade TTU apresia ho tua figus no kafé ne’ebé prodús hosi Oé-Cusse.

Autoridade TTU apresia ho tua figus no kafé ne’ebé prodús hosi Oé-Cusse.

Prezidente Autoridade TTU, Juandi David, vizita stand Oé-Cusse no konege hola produtu tua figus no kafé. Imajen Tatoli/Abílio Elo Nini.

KEFAMENANU 22 setembru 2022 (TATOLI)–Prezidente Autoridade Timur Tengah Utara (TTU), Juandi David, orgullu no apresia ho Autoridade Rejiaun Administrativa Espesiál Oé-Cusse Ambeno (RAEOA), tanba bele prodús rasik produtu lokál hanesan ai-figus ba tua no xá, inklui kafé ne’ebé morin tebes no diferente ho kafe tugu buaya ne’ebé prodús hosi Indonézia.

Autoridade másima TTU ne’e hato’o nia apresiasaun hafoin vizta stand sira-ne’ebé promove produtu lokál iha selebrasaun aniversáriu tinan-100 sidade Kefamenanu iha kampu edifísiu Kefamenanu, kinta ne’e.

“Iha futuru Oé-Cusse sei koñesidu ho produtu rua ne’e, Oé-Cusse iha stand hatudu rezultadu produsaun agrikultura nian ne’ebé iha, realidade ohin ha’u mai haree hakfodak, tanba bele prodús rasik alkól (tua) hosi ai-figus ho kafé ne’ebé iha kualidade tebes, tanba alkól ne’e bele prodús hosi ai fuik ida bele di’ak. Ne’e mak ami apresia ho hakarak iha futuru ami sei presiza liuhosi kooperasaun ida, nune’e TTU mós bele konsumu produtu ne’e,” Juandi David, informa ba Agência Tatoli hafoin hala’o vizita ofisiál ba stand Oé-Cusse iha Kefamenanu, kinta ne’e.

Nia orgullu no kontente, tanba durante nia vizita iha stand hotu-hotu to’o stand Oé-Cusse maka bele hola tua barak no kafé, tanba ne’e buat foun ba TTU, tanba Oé-Cusse mak prodús rasik.

“Né’ebé iha futuru ita sei serbisu hamutuk, liuliu ba boa-governasaun, agrikultura, no setór sira seluk, ita sei serbisu hamutuk liuhosi kooperasaun ida iha loron oin mai,” nia orgullu.

Sekretária Rejionál Adjunta Prezidente Autoridade ba Asuntu Reforsu Institusionál, Leonia da Costa Monteiro, hatete Oé-Cusse mai partisipa tanba foin daudaun nasaun rua selebra tinan 20 ba fronteira ne’ebé iha akordu asinadu hosi lidér sira, hodi bele serbisu hamutuk.

“Entaun produsaun ne’ebé ita iha bele mai promove iha nasaun viziñu, no mós produtu ne’e sira iha, ita bele lori nia produsaun ne’ebé di’ak atu implementa iha Oé-Cusse, tanba relasaun ne’e, polítika mak hafahe fronteira, kulturalmente hanesan, liuliu TTU ho RAEOA, ninia tradisaun kultura ne’ebé maka aprezenta iha karnavál kuaze hanesan,” nia dehan.

Nune’e presiza serbisu hamutuk atu promove nafatin kultura ida-ne’e sai di’ak liután liuhosi selebrasaun akordu iha futuru mai.

Nia dehan, tipu hosi produtu lokál ne’ebé autoridade promove iha selebrasaun aniversáriu tinan 100 TTU, maka hanesan,  foos membramo, kafé, tua figus no xá figus, produtu tais no seluk tán.

“Produtu iha lori mai, hanesan kafé Oé-Cusse, nia produsaun sirkula iha merkadu no loza sira, iha nasionál no rejionál, agora ita lori mai iha Indonézia, TTU bele sira koñese, nune’e bele alarga tán iha NTT, nune’e mós ba produsaun tua prodús hosi ai-figus sirkula ona,” nia katak.

Nia parte agradese ba autoridade TTU, liuliu Prezidente Autoridade TTU tanba konsege sosa kedas tua ne’e hotu kedas, ne’e bele hatudu katak sira haree produsaun ne’ebé Oé-Cusse halo bele promove ona iha nasaun viziñu.

Jornalista : Abílio Elo Nini

Editór        : Evaristo Soares Martins

iklan
iklan

Leave a Reply

iklan
error: Content is protected !!