Governu husu traballadór timoroan iha diáspora labele utiliza arte-marsiál halo konflitu
DILI, 26 setembru 2022 (TATOLI) – Governu liuhosi Ministériu Negósiu Estranjeiru no Kooperasaun (MNEK), apela ba traballadór hotu ne’ebé hetan oportunidade ba serbisu iha diáspora labele utiliza arte-marsiál hodi halo konflitu tanba bele estraga no hamonu dignidade nasaun nian.
“Ba traballadór hotu ne’ebé mak sai ona ba serbisu iha rai-li’ur, husu imi hotu atu serbisu ho disiplina no serbisu loloos de’it, tanba imi ba ne’e reprezenta nasaun, labele utiliza arte-marsiál hodi halo problema, oho malu ne’e hatún nasaun nia dignidade,” Vise MNEK, Julião da Silva, koalia iha MNEK, Praia dos Coqueiros, Dili, segunda ne’e.
Nia dehan, bainhira traballadór sira halo konflitu ba malu no uza arte-marsiál mak taka dalan no halo fraku relasaun bilaterál ne’ebé nasaun rua selebra ona.
“Bainhira ita-boot sira ba serbisu mak halo konflitu bele hamonu relasaun di’ak ne’ebé nasaun rua halo ona no taka dalan ba timoroan seluk atu ba serbisu,” nia fó hanoin.
Nune’e nia husu ba líder arte-marsiál no arte-rituál hotu atu fó atensaun ba membru sira-ne’ebé oras ne’e serbisu iha ema-nia rain.
Tuir dadaus ne’ebé MNEK hetan maioria timoroan ne’ebé ba serbisu iha Korea Súl no Inglaterra mak utiliza arte-marsiál hodi baku malu.
“Nasaun ne’ebé ita halo ona kooperasaun ne’e ita labele ba halo fali konflitu iha-ne’ebá, nasaun sira seidauk halo kooperasaun ne’e hanesan Inglaterra ita seidauk halo kooperasaun mak ita halo ona problema ne’e imajen ladi’ak, ema bele kansela ita-nia kooperasaun iha futuru,” governante ne’e fó hanoin ba timoroan ne’ebé serbisu diáspora.
Jornalista: Hortencio Sanchez
Editór: Evaristo Soares Martins
