DILI, 26 setembru 2022 (TATOLII)-Komandante Jerál Polísia Nasionál Timor-Leste (PNTL), Komisáriu Faustino da Costa, husu ba komandu munisípiu sira no membru hotu atu adapta aan, serbisu tuir sistema dijitalizasaun hodi atende serbisu polísia ho efisiensia.
“PNTL hahú adapta aan, uza sistema dijitalizasaun bele ajuda imi-nian servisu iha munisípiu ba atendimentu kazu sira”, Komisáriu Faustino da Costa hateten iha nia intervensaun bainhira loke semináriu loron ida ba nivel ezekutivu, ne’ebé akontese iha sentru formasaun polísia, Komoro, segunda ne’e.
Timor-Leste Police Develoment Program (TLPDP) hamutuk ho PNTL realiza sorumutu ne’e hodi introdús sistema dijitalizasaun ne’ebé instala ona ba komandante munisípiu no membru sira atu utiliza iha sira-nian servisu lorloron nian.
Notísia relevante: TLPDP Konstrui Edifísiu Foun PNSIK Kompleta Ho Fasilidade Deteta Droga
“Ita bo’ot sira haree komandante munisípiu sira kuandu mai hato’o relatóriu mai komandu jerál, sira ho lori surat-tahan barak, maibé kuandu sira adopta ona sistema dijitál ne’e bele hamenus mós gastu sira”, nia akresenta.
Tuir nia, ho semináriu loron ida ne’e bele aumenta membru hotu nian koñesementu konaba utilizasaun sistema dijitál. “Ha’u hanoin liuhosi semináriu loron ida ne’e bele ajuda membru PNTL sira, liuliu komandante munisípiu atu hakle’an koñesementu, oinsá sira uza no jere bainhira halo serbisu polisiál, liuliiu atendimentu kazu sira”.
PNTL instala ona sistema dijitalizasaun iha 2015 ho naran Kalohan, objetivu mak fasilita di’ak liutan servisu. Maibé, komandu munisípiu sira seidauk adapta ba operasionalizasaun, nune’e balun kontinua ho sistema manuál.
“Ha’u hanoin ita presiza domina sistema ne’e nia operasaun, nune’e bele ajuda duni serbisu PNTL nian loronloron hanesan atendimentu ba kazu sira, nune’e movimentu ilísitu sira iha ita nia rai”, realsa.
Instituisaun ne’e ninian portál ne’ebé kontinua atualiza sira-nian atividade, lejislasaun, misaun, istória, no informasaun importante seluk iha www.pntl.tl. Hosi portál ne’e hatudu iha links KALOHAN PNTL, maibé bainhira klik mosu mensajen page not found.
Jornalista : Natalino Costa
Editora : Rita Almeida
