DILI, 26 setembru 2022 (TATOLI)—Prezidente Repúblika (PR), José Ramos Horta, sábadu (24/09) ne’e, hala’o enkontru bilaterál ho Primeira-Ministra Nova Zelándia, Jacinda Ardern, hafoin partisipa iha Asembleia Jerál Organizasaun Nasoens Unidas (ONU) ba dala-77 iha Nova Iorke Estadu Unidu Amérika
Enkontru ne’e, partisipa hosi Ministra Negósiu Estranjeiru no Kooperasaun (MNEK), Adaljiza Magno no Embaixadór Timor-Leste ba ONU, Karlito Nunes, no seluk tan.
Prezidente Repúblika, José Ramos Horta informa, enkontru ho Primeira-Ministra Nova Zelándia, ko’alia liu kona-ba situasaun internasionál, liu-liu kona-ba funu entre Ukránia ho Rúsia ne’ebé fó impaktu ba mundu inklui, Timor-Leste.
“Ami ko’alia liu-liu kona-ba situasaun internasionál balun. Klaru hotu-hotu ko’alia kona-ba problema boot iha Ukránia, tanba konflitu Rúsia ho Ukránia ne’e impaktu ba mundu tomak inklui ba ita, através de problema, sansaun, komérsiu internasionál hetan impaktu entaun folin sasán sa’e iha mundu, tanba ne’e mak impaktu ita diretamente no Timor-Leste nia pozisaun klaru ba ida-ne’e. Maibé, ko’alia mós kona-ba Myamar, ita labele ko’alia de’it kona-ba funu iha dook hanesan Ukránia, maibé la ko’alia kona-ba buat ne’ebé akontese iha ASEAN nia klaran hanesan Myanmar,” PR Horta hateten liu hosi komunikadu imprensa ne’ebé Agéncia TATOLI asesu hosi mídia Palásiu Prezidensiál Nicolau Lobato, Bairru Pite, segunda ne’e.
Xefe Estadu konsidera, relasaun bilaterál Timor-Leste nian ho Nova Zelándia hanesan prioriodade nasionál hanesan mós Austrália ho Indonézia no seluk tan.
“Ne’eduni relasaun bilateral ho Nova Zelándia ha’u konsidera hanesan prioridade nasionál, importante hanesan ita-nia relasaun ho Austrália, importante hanesan ita-nia relasaun ho Indonézia no rai sira seluk hanesan Singapura. Maibé haree mós ba posibilidade Timor-Leste ho Nova Zelándia atu inkrementa liután relasaun bilateral. Ne’e mak ko’alia di’ak ho señora Primeira-Ministra Nova Zelándia,” Horta hateten.
Maske nasaun ne’ebé ki’ik no la viziñu ho Timor-Leste, PR Horta dehan, Nova Zelándia mós fó apoiu makaas tebes ba Timor-Leste dezde iha tempu luta, tanba iha tinan 1999 Nova Zelándia ho nasaun sira seluk mak halo negosiasaun no mediasaun hodi haruka International Force for East Timor (INTERFET) mai Timor-Leste.
Nune’e mós iha krize 2006, Nova Zelándia kontinua apoiu forsa mai Timor-Leste hodi fó apoiu seguransa iha Timor-Leste.
Jornalista : Nelson de Sousa
Editór : Cancio Ximenes
