Sofre kankru raan pasiente na’in hitu lakon vida
DILI, 26 setembru 2022 (TATOLI) – Diretór Ezekutivu Klínika Bairo-Pite, Inacio dos Santos, hateten durante ne’e klínika ida ne’e rejista pasiente kankru raan hamutuk 28 no husi númeru ne’e na’in hitu mak lakon vida.
“Ita hahú halo diagnóstiku ba moras kankru raan ida ne’e, dezde 2013, pasiente hamutuk 28 mak halo tratamento iha ne’e maibé husi númeru ne’e nain hitu mak mate ona no agora daudaun pasiente ne’ebé ativu halo tratamentu hamutuk 21”, Diretór Ezekutivu Klínika Bairo-Pite, Inacio dos Santos, informa ba TATOLI iha nia kna’ar fatin, ohin.
Nia dehan, pasiente hirak ne’e mai husi Munisípiu Lautem, Baucau, Aileu, Covalima inklui Rejiaun Administrativa Oe-Cusse Ambeno (RAOEA), entaun ida ne’e mak durante halo tratamentu kankru raan iha klinika Bairo-Pite.
“Pasiente sira ne’e idade maioria 30 to’o 50 inklui mós labarik idade 14 mak sofre ba moras kankru raan ida ne’e”, refere.
Diretór Ezekutivu afirma moras kankru raan ne’e nia kauza mai husi jenétiku ka jerasaun, kauza seluk mak mai husi radiasaun hanesan bomba ne’ebé okupasaun Indonesia uza iha Timor-Leste no nia kauza seluk mak aihan importadór sira ne’ebé mak barak iha kímiku, entaun ida ne’e halo atu hetan moras kankru raan.
‘’Kona-ba fulan ida ne’e to’o dezembru ita nia ekipamentu médiku sufisiente maibé ba tinan oin mak ita problema ona medikamentu tanba ita nia asina memorandu ho Ministériu Saúde remata iha fulan dezembru deit, agora daudaun ita buka meius oinsá para halo importasaun ba medikamentus sedu atu iha sustentabilidade ba pasiente sira. Tanba durante ne’e doadór no parseiru sira husi Estadu Unidu Amerika mak apoiu ita”, konklui.
Jornalista : Felicidade Ximenes
Editór : Zezito Silva
