TL-Portugál esforsu hela atu haruka timoroan ba serbisu iha Europa
DILI, 26 setembru 2022 (TATOLI) – Vise Ministru Negósiu Estranjeiru no Kooperasaun (MNEK), Julião da Silva, fó-sai katak, daudaun ne’e esforsu hela nune’e timoroan sira bele ba serbisu iha kontinente Europa.
“Agora MNEK serbisu maka’as hela ho Ministériu Negósiu Estranjeiru Portugál nian atu elabora lalais akordu bilaterál atu haruka timoroan sira ba serbisu iha nasaun sira iha Europa inklui Portugál,” Julião da Silva, ko’alia iha MNEK, Praia dos Coqueiros, Dili, segunda ne’e.
Governante ne’e dehan, timoroan hirak-ne’ebé daudaun ne’e terus hela iha Portugál tanba seidauk hetan serbisu no MNEK hetan ona informasaun no buka dalan hela atu rezolve.
“Sira-ne’e ita simu ona informasaun maibé ita esforsu hela liuhosi Polísia Sientífiku Investigasaun Kriminál (PCIC, sigla portugés) haruka ona sira-nia intelijénsia hamutuk ema na’in-20 ba Portugál, sira sai hanesan traballadór hotu atu buka informasaun loloos iha ne’ebá hodi haree sé mak organiza atividade sira hanesan ne’e, tanba sira ba ne’e ilegál, fó buat-ne’ebé inserteza ba ita-nia joven sira,” nia dehan.
Nia akresenta, serbisu MNEK nian informa ona ba timoroan sira iha Portugál, atu hakbesik ba embaixada hodi rejista naran nune’e buka dalan rezolve.
Nune’e, nia husu ba timoroan hotu sei iha Timor atu bá Portugál tenke buka hatene informasaun loloos hafoin aranka.
“Husu ba joven sira-ne’ebé agora sei iha Timor hela karik, lalika ansi, hein lai akordu Governu nian iha ona ho baze legál no kontratu hotu mak imi bele bá. Agora labele lai, keta halo imi bele sai vítima iha ema-nia rain,” nia husu.
Tuir dadus ne’ebé MNEK iha timoroan besik rihun ida mak daudaun ne’e terus hela iha Portugál no na’in 100-resin mak rejista ona iha embaixada no restante seidauk.
Jornalista: Hortencio Sanchez
Editór: Evaristo Soares Martins
