Top

Veteranu 50 sei simu kondekorasaun iha selebrasaun loron proklamasaun independénsia

Veteranu sira la'o ain husi Palásiu Governu ba CCD hafoin partisipa Aniversariu Loron Veteranu nian ba da-44 iha Palácio Governu, 03 Marsu 2020. Imajen/António Gonçalves.

DILI, 26 setembru 2022 (TATOLI)–Prezidente Konsellu Veteranu Libertasaun Nasionál (CCLN-sigla portugés), Vidal de Jesus “Riak Leman”, informa CCLN propoin veteranu na’in-50 sei simu kondekorasaun iha selebrasaun loron proklamasaun independénsia ba dala-47 (28 novembru 1975-28 novembru 2022).

“Ami propoin vetaranu ne’ebé mak atu hetan kondekorasaun iha 28 novembru tinan ne’e kada munisípiu iha ema na’in-50 maibé veteranu ne’ebé mak naran hetan reklamasaun sei la hetan kondekorasaun,” Riak Leman hateten ba Agência Tatoli, via telefónika, segunda ne’e.

Riak Leman hateten, sira-ne’ebé mak hetan reklamasaun tanba uluk servisu hamutuk ho inimigu sira iha tempu luta ba libertaaun nasionál hala’o kna’ar hanesan Mau-Huu no Bi-Huu sira-ne’e labele hetan kondekorasaun.

“Kondekorasaun ne’ebé mak Governu atu fó mak medalla de’it,” nia dehan.

Nia dehan, planu hirak-ne’e to’o lista sira CCLN entrega ona ba konsellu munisipál atu taka iha kuadru munisipál nian.

“Iha loron proklamasaun ne’e kada munisípiu sei selebra loron proklamasaun independénsia ne’e iha ida-daik nia munisípiu sira,” nia hateten.

Orsamentu ba kondekorasaun nian ne’e hamutuk $57,000 no hosi osan ne’e atu halo mobilizasaun veteranu iha postu administrativu ba iha munisípiu sira, inklui han hemu nian.

Jornalista : Osória Marques

Editór       : Cancio Ximenes

Publisidade

Leave a Reply

Latest Post

error: Content is protected !!