DILI, 28 setembru 2022 (TATOLI)—Sekretariadu Estadu ba Formasaun Professionál no Empregu (SEFOPE) liuhusi Diresaun Nasionál Empregu Esteriór (DNEE) halo klarifikasaun ba prosesu rekrutamentu kandidatu traballadór Mariano Cohen da Silva ne’ebé adia temporariamente husi kompañia Kone Group Australia.
Diretór Nasionál DNEE, Filomeno Soares, halo klarifikasaun ne’e relasiona deklarasaun Deputadu Bankada CNRT, Gabriel Soares, iha plenária Parlamentu Nasionál (PN) ne’ebé hatete, SEFOPE liuhusi DNEE halo mudansa ba traballadór sira sem razaun, liu-liu ba traballadór Mariano Cohen da Silva.
Diretór ne’e esplika, nia rasik mak aprova rezultadu teste, maibé mudansa akontese tanba desizaun hosi kompañia. “Ami simu mensajen katak muda Cohen da Silva no tau fali Julião Martins, maibé Cohen sei tau ba lista rezerva katak standby no la kansela total”, Filomeno Martins hatutan liuhusi konferénsia imprensa iha DNEE Bekora, kuarta ne’e.
Tuir kronolojia, iha fulan-abríl 2022, empregadór Kone Group halo selesaun ba kandidatu traballadór hamutuk 20, maibé kandidatu nain rua labele pasa ba etapa tuir mai tanba falla iha medical test (teste saúde) inklui trabalhador ho naran Julião Martins husi Atauru.
Nune’e iha agostu 2022, Kone Group halo fali selesaun, DNEE aprezenta ema-nain 17 no nain sia mak pasa ba prosesu entrevista liuhusi online iha 15 agostu, rezultadu ikus hili nain neen, inklui Cohen.
Maibé iha loron 23 agostu, Kone Group manda hikas karta notifikasaun ida katak atu halo mudansa temporária ba kandidatu traballadór Mariano Cohen da Silva ba Julião Martins ho razaun saúde. Tanba ne’e, Kone Group liuhosi karta notifikasaun iha loron 27 fulan-ne’e husu ba Cohen atu aprezenta fali rezultadu teste saúde ilha Standford Medical Center.
Relasiona ho deklarasaun husi PN no família, Diretór hateten halo ona mediasaun maibé família la konsege pasiensia hodi deixa ba PN.
Nia esplika, SEFOPE rasik durante ne’e servisu ho entidade kontrolu Estadu hanesan KAK, PDHJ, Inspetór Estadu, KFP no auditóriu internu SEFOPE hodi kontrola boa-governasaun.
“Hakarak fó hatene ba juventude hotu, SEFOPE hamriik hodi atende joven ne’ebé interese servisu ba rai liur, prepara aan ba, mai ho disiplina, kumpre regra ne’ebé mak iha, hatudu atitude di’ak nune’e empregadór sira bele foti imi”, katak Filomeno Martins.
Jornalista : Cidalia Fátima
Editora : Armandina Moniz
