DILI, 29 setembru 2022 (TATOLI) – Prezidente Federasaun Futeból Timor – Leste (FFTL), Francisco Jerónimo informa, Timor – Leste kansela la partisipa iha jogu kualifikasaun kopa Ázia Football Confederation (AFC) Under 17 (U-17) iha Baharain tanba kondisan la permite.
“Kanselamentu ne’e normal, sé ita laiha posibilidade atu ba, di’akliu kansela, tanba ita-nia kondisaun reál, voo atu to’o iha-ne’ebá defisil loos, alojamentu buat-hotu ami tetu ba mai susar uitoan entaun ita kansela,” Prezidente FFTL ko’alia iha Palásiu Governu, kinta ne’e.
Prezidente FFTL ne’e kontaktu ona ho AFC hodi esplika situasaun hotu ne’ebé FFTL enfrenta hafoin halo kanselamentu ba jogu ne’e.
“Ami kontaktu no informa situasaun sira hotu mak kansela, laiha impaktu ba FFTL, ita haree hotu situasaun tanba keta halo ita-nia jogadór sira ba to’o iha-ne’ebá hetan difikuldade ladún di’ak,” nia dehan.
Kualifikasaun Kopa Ázia ne’e sei realiza iha nasaun Baharain iha tinan 2023.
Hosi totál nasaun 44 ne’e fahe ba grupu A too J ne’ebé kada grupu nasaun lima, balun haat no Timor-Leste okupa iha grupu H hamutuk ho Tajikistaun, Afganistaun no Mongolia.
Nasaun hirak-ne’e mak iha grupu A kompostu hosi, Japaun, Jordan, Síria, Filipina no Turkmenistaun. Grupu B kompostu Indonézia, Malázia, Palestina, Guam no UAE. Grupu C Oman, Iraque, Qatar, Lebanon no Bahrain.
Enkuantu grupu D mak Índia, Arabia Saudita, Myanmar, Maldives no Kuwait no grupu E mak Iémen, Bangladesh, Singapura no Butaun.
Grupu F mak Tailándia, Vietname, Xina Taipe no Nepali. Grupu G mak Austrália, Repúblika Populár Xina, Kambodia no nasaun ida sei iha prosesu nia laran.
Grupu I kompostu hosi Iraun, Hongkong, Kyrgyz Republic no Laos. Grupu J mak Repúblika Korea, Brunei Darusalam, Uzbekistaun no Sri Lanka.
Jornalista: Hortencio Sanchez
Editór: Evaristo Soares Martins