DILI, 30 setembru 2022 (TATOLI)—Diretór Ezekutivu empreza A-Smart Holdings Ltd, Liam Huan Chiang, informa, daudaun ne’e halo hela avaliasaun ba dokumentu konkursu públiku sira hosi empreza internasionál 12 ba projetu konstrusaun Marina Square Dili.
“Ami halo ona konkursu ba kontratu konstrusaun Marina Square no iha empreza konstrusaun internasionál 12 mak hato’o ona interese hodi partisipa, maibé serbisu konstrusaun ne’e komplikadu,” Diretór empreza hateten ba Agência Tatoli, via email, sesta ne’e.
Hafoin simu pedidu sira, empreza A-Smart Holdings Ltd halo diskusaun detallu ho empreza konkorrente sira.
“Ami agora diskute hela ho empreza sira ne’ebé hili ona no rezultadu sei entrega iha fulan tuir mai,” nia akresenta.
Notísia relevante: Governu no empreza hatuur fatuk dahuluk ba konstrusaun Marina Square
Nune’e, konstrusaun fíziku ba projetu ne’e sei hahú iha tinan ne’e nia rohan tuir kalendáriu ne’ebé planea ona, ho durasaun serbisu durante tinan-tolu.
Projetu konstrusaun ba Marina Square ne’e lokaliza iha antiga rezidénsia saudozu Francisco Xavier do Amaral, Lecidere, Dili, ne’ebé antes ne’e Primeiru-Ministru, Taur Matan Ruak, akompaña hosi Diretór Ezekutivu empreza A-Smart Holdings Ltd, Liam Huan Chiang, hatuur ona fatuk dahuluk iha loron 17 maiu 2022.
Empreza Timor Marina Square, S.A, hanesan responsável projetu, hosi nasaun Singapura, fó prioridade ba setór investimentu turizmu, ho kapitál investimentu millaun $50, ne’ebé iha faze inísiu tuir planu sei emprega traballadór timor-oan hamutuk 420.
Jornalista : Antónia Gusmão
Editora : Julia Chatarina
