Top

FDCH fó kursu SOT ba membru PNTL na’in-17

Ofisiais membru PNTL. Imajen Tatoli /Antonio Daciparu

DILI, 30 setembru 2022 (TATOLI)— Fundu Dezenvolvimentu Kapitál Umanu (FDCH) fó kapasitasaun ka kursu Supervisaun Operasaun Territóriu (SOT) ba Membru Polisia Nasionál Timor-Leste (PNTL) nain-17.

Kursu Supervisaun Operasaun Territóriu ne’ebé hala’o durante semana rua, realiza hosi FDCH no Komandu Jerál PNTL, ne’ebé partisipa husi nivél Komandu Eskuadra sira, Xefe Seksaun sira iha Komandu PNTL Dili, membru ho postu sarjentu, sarjentu xefe, asistente inspetór, inspetór no inspetór Xefe.

Biban ne’e, Diretór FDCH, Cristovão dos Reis, hateten kursu SOT ne’e importante atu hasa’e koñesimentu ba iha membru PNTL nian.

“Formasaun ne’e atu ajuda hasa’e koñesimentu no abilidade membru sira nian, nune’e serbisu tuir kna’ar ne’ebé lei fó atu garante seguransa ba ita nia povu hodi povu bele sente seguru.” hateten Diretór Cristovão bainhira partisipa seremónia enserramentu Kursu Supervisaun Operasaun Territóriu ne’ebé hala’o iha CFP-Comoro, sesta ne’e.

Nune’e, nia kongratula membru PNTL na’in-17 ne’ebé maka konklui ona formasaun SOT, espera futuru membru sira bele implementa teória no prátika sira ne’ebé maka durante ne’e apreende iha kursu.

“FDCH  komprometidu atu kontinua fó formasaun ba PNTL atubele kumpre nia serbisu didi’ak, nune’e bele fó seguransa ne’ebé di’ak no asegura komunidade ho diak iha tempu kalan sira bele sente situsaun hakmatek no livre,” nia afirma.

FDCH mós tau ona planu atu tinan oin, prevee orsamentu atu fó formasaun no kapasitasaun ba membru FALINTIL-Forsa Defeza Timor-Leste (F-FDTL) no ba PNTL, nune’e ba futuru institusaun rua ne’e halo nia kna’ar hodi garantia seguransa iha territóriu nasionál ho di’ak.

Iha biban hanesan, Komandante Sentru Formasaun Polísia (CFP, sigla portugés), Superintendente Xefe, Arquimino Ramos, mós hato’o kongratulasaun ba iha kooperasaun entre CFP no FDCH, hodi oferese formasaun SOT ba membru polisia sira.

“Ha’u agradese tebes ba koooperasaun institusionál entre PNTL ho FDCH, tanba ho koopersaun ne’e ita bele realiza kursu supervisaun operasaun ba membru PNTL sira.” Nia agradese.

Tanba, nia dehan kursu ida ne’e importante tebes ba iha membru PNTL sira liuliu ba  iha nivél jestór sira hosi Komandante Eskuadra no  Komandante seksaun sira atu halo  planu no jestaun sira.

Nune’e, Komandante ne’e husu atu membru sira ne’ebé maka tuir Kursu Supervizaun Operasaun Territóriu bele aplika teória no prátika iha serbisu loron-loron.

Komandante Sentru Formasaun Polísia, Supertendente Xefe, Arquimino Ramos, preukupa tanba orsamentu PNTL ba tinan laiha verva ida ne’ebé atu aloka ba iha CFP atu halo formasaun atu kapasita membru PNTL sira.

“Ita bo’ot sira hatene seguransa interna nasaun nia ne’e iha polísia nia lima, tanba ne’e polísia tenke tuir formasaun barak, nune’e oinsá maka halo seguransa ba povu no nasaun ho di’ak liután,” nia afirma.

“Ita PNTL tenke kapasita sira nia aan halo barak, nune’e bele hasoru amesa no tentativa iha mundu oin loron nian liu amesa sira liga ba dijitalizasaun,” hatutan.

Jornalista: Natalino Costa

Editór     : Florencio Miranda Ximenes

Publisidade

Leave a Reply

Latest Post

error: Content is protected !!