iklan

EDUKASAUN, HEADLINE

CS-UNTL hala’o espozisaun produtu fotografia

CS-UNTL hala’o espozisaun produtu fotografia

Estudante Komunikasaun Sosiál UNTL, hala’o espozisaun foto, video no mídia online iha Palásiu Prezidensial Bairru-Pité,Dili, Imajen Tatoli/Arminda Fonseca

DILI, 01 outubru 2022 (TATOLI)— Estudante sira hosi Departamentu Komunikasaun Sosiál liuhosi Fakuldade Siénsia Sosiál iha Universidade Nasional Timor Lorosa’e (UNTL), halo espozisaun ba sira-nia produtu fotografia,video no mídia online ne’ebé durante ne’e sira aprrende.

Objetivu prinsipál hosi espozisaun atu hatudu estudante nia produtu ne’ebé durante ne’e aprende iha matéria formatu hanesan eskrita video, foto no mídia online no liuhosi meiu ne’e konvida oradór sira atu haree no fó hanoin bá estudante sira-nia atu mellora nia produtu sira.

“Espozisaun ne’e, ita halo durante loron tolu no ita konvida oradór sira mai haree estudante sira-nia obra no kada oradór hato’o mós sira-nia hanoin, koñesimentu no esperénsia sira ba estudante sira, ha’u fiar estudante sira aprende buat barak hosi oradór sira,” Diretór Departamentu Komunikasaun Sosiál Fakuldade Siensia Sosiál UNTL, Marcelino Ximenes Magno, hateten ba Agência TATOLI iha Palásiu Prezidensiál Bairru-Pité, Dili, sábadu ne’e.

Espozisaun ne’e nia vantajen mak estudante sira bele koñese oradór sira no halo koneksaun ho oradór sira bainhira estudante sira presiza konsulta ho oradór sira relasiona ho sira-nia estudu.

Nune’e, nia agradese tebes ba estudante sira-nia esforsu halo espozisaun ne’e tanba liuhosi atividade ne’e estudante sira bele aprende buat barak tanba kada oradór sira mai hato’o sira-nia hanoin relasiona espozisaun ne’e.

“Ezemplu iha espozisaun ne’e estudante sira aprezenta fotografia, maibé laiha caption ida ne’e oinsá fó hanoin ba estudante sira katak bainhira fotografia tenke iha caption atu nune’e bele hatene katak foto ne’e konta saida, ida la’ós bá estudante de’it maibé mós ba ami profesór sira,” nia agradese.

Iha fatin hanesan, Editora Ezekutivu Agência Notiçiosa de Timor-Leste, Institutu Públiku (ANTIL,I.P), Rita Almeida, hateten ko’alia kona-ba obra jornalizmu labele haluhan 5W1H tanba liuhosi formula ida ne’e mak jornalista fó sai ka hato’o informasaun ne’ebé loos.

“Obra jornalizmu tenke iha valór, mak ita-nia obra ne’e tanke hato’o mensajen ne’ebé edukativu no muda ema-nia pensamentu, maibé informasaun ne’ebé ita hato’o mak seidauk to’o atu muda ema-nia pensamentu ita tenke kontinua luta. Ho nune’e liuhosi espozisaun ne’e tenke reflete saida mak ita halo ona no kontinua atu halo ba ita-nia sosiedade,” katak

Editora Ezekutivu ne’e mós husu ba estudante sira aproveita didi’ak meiu hotuhotu iha internet hodi uza tuir nia regra tanba informasaun hotuhotu ne’ebé fó sai iha mídia sosiál la’ós loos hotu.

“Ita hanesan estudante, ita hatudu ita-nia produtu ne’ebé presiza liu mak kualidade la’ós kuantidade, maske kuantidade ne’e mós presiza hotu, tanba ita-nia atu muda ema-nia pensamentu importante mak kualidade no kredibilidade,” nia fó hanoin.

Jornalista: Arminda Fonseca

Editór      : Florencio Miranda Ximenes

iklan
iklan

Leave a Reply

iklan
error: Content is protected !!