iklan

EKONOMIA, HEADLINE

Ekipa interministeriál sei aprezenta dezeñu uniforme uza tais ba KM

Ekipa interministeriál sei aprezenta dezeñu uniforme uza tais ba KM

Fundasaun Alola organiza atividade ba inan-feton sira soru tais tradisionál, segunda (30/5/2022). Imajen Tatoli/Antóonio Daciparu

DILI, 03 outubru 2022 (TATOLI)—Koordenadór Programa ba Tais hosi Ministériu Turizmu Komérsiu no Indústria (MTKI), António da Costa, hateten, ekipa interministeriál sei aprezenta dezeñu uniforme uza hena tais Timór ba estudante no funsionáriu públiku ba Konsellu Ministru (KM).

“Empreza Futus Furak sei suku unifome ba estudante sira no Rui Collection ba funsionáriu públiku. Sira konklui ona dezeñu uniforme no entrega ona ba ekipa interministeriál iha loron 04 abril. Agora ekipa interministeriál prepara hodi aprezenta fali ba Konsellu Ministru hodi hetan aprovasaun,” Koordenadór programa informa ba Agência Tatoli, iha Caicoli, segunda ne’e.

Nia dehan, atu uza tais sai uniforme ba atividade eskola no serbisu nian presiza rezolusaun ida hosi Governu.

“Antes ba aprezenta iha Konsellu Ministru, ita mós sei halo konsultasaun ida ho Komisaun Funsaun Públika (CFP, sigla portugés) no Ministériu Edukasaun Juventude no Desportu,” nia akresenta.

Notísia relevante: Liña ministeriál kria konseitu utiliza tais sai uniforme nasionál

Antes ne’e, MTKI prepara ona ezbosu rezolusaun atu prodús tais sai uniforme nasionál ba funsionáriu públiku no estudante sira iha Timor-Leste, atu fortifika desizaun Governu ba instituisaun sira bele aplika programa.

Utiliza tais Timór ba uniforme nasionál fó biban hodi konsolida no promove nafatin identidade Timor-Leste tantu iha rai-laran no ba mundu internasionál.

Aleinde ne’e, programa materiál tais sai nu’udar uniforme ofisiál bele tulun negosiante tais sira no loke tan kampu serbisu, liu-liu ba inan feton sira iha área rurál.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!