iklan

EKONOMIA, HEADLINE

PM Taur orienta BTL, E.P mellora sistema fornesementu bee iha Dili

PM Taur orienta BTL, E.P mellora sistema fornesementu bee iha Dili

Distribuisaun bee-moos. Imajen/BTL, E.P

DILI, 04 outubru 2022 (TATOLI)–Prezidente Konsellu Administrasaun Bee Timor-Leste, Empreza Públika (BTL,E.P), Carlos Peloi dos Reis, tersa ne’e, relata serbisu ba Primeiru-Ministru (PM), Taur Matan Ruak.

Biban ne’e, PM orienta BTL atu mellora sistema fornesementu bee-moos sira iha kapitál Dili hodi nune’e lori bee ba komunidade hotu.

“Relata progresu serbisu ba Primeiru-Ministru no simu orientasaun hodi aselera liután serbisu bee no saneamentu ba komunidade iha territóriu tomak, liuliu mellora sistema fornesementu bee iha Dili. Primeiru-Ministru fó hanoin ami atu kontinua halo serbisu operasaun no manutensaun sistema boot sira, liliu iha Dili atu garante bee ba komunidade. Tanba tuir Xefe Governu nia observasaun katak BTL halo duni esforsu maibé presiza mellora tan atubele aselera serbisu sira,” Prezidente Konsellu Administrasaun BTL, E.P hateten hafoin hasoru Xefe Governu, iha Palásiu Governu.

Notísia relevante: BTL sei promove melloramentu bee-moos iha kapitál postu administrativu

Aleinde ne’e, PM fó hanoin mós katak presiza aselera serbisu iha kapitál Dili no munisípiu sira ne’ebé hetan apoia hosi parseiru dezenvolvimentu sira.

“Primeiru-Ministru orienta atu ami halo koordenasaun di’ak ho parseiru sira hotu atu nune’e iha prosesu implementasaun labele enfrenta serbisu dobradu. Iha planu integradu nune’e bele aselera serbisu sira ho organizadu,” nia akresenta.

BTL, E.P komprometidu halo esforsu hodi mellora sistema fornesementu bee, ne’ebé esforsu ida mak agora ekipa operasaun manutensaun kontinua halo serbisu melloramentu sistema ne’ebé eziste atu garante bee ne’e la’o.

“Rekoñese katak iha fatin barak iha Dili komunidade seidauk asesu bee, maibé BTL kontinua esforsu atu mantein no jere sistema ne’ebé iha atu lori bee ba komunidade. Esforsu seluk maka ami halo hela preparasaun planu integradu atu mellora sistema bee iha Dili ba tempu naruk nian. Dezeñu detelladu finaliza ona no iha ona akordu ho Banku Mundiál hodi apoia mellora sistema bee-moos iha Dili,” nia subliña.

Empreza estatál ne’e hasoru dezafiu sira liliu iha Dili, tanba sistema bee-moos antigu ona no presiza hadi’a.

“Sasán sira ne’ebé presiza melloramentu mak sistema ezistente sira ne’ebé maioria tenke importa hosi rai-li’ur ho durasaun tempu naruk. Difikuldade seluk mak rekursu bee rasik, tempu udan bee barak enkuantu tempu bailoron bee menus, bomba 26 iha Dili balun bee iha rai-laran komesa menus, entaun dala ruma oras operasaun bomba BTL redús, tanba ne’e maka dalaruma iha fatin balun karik durante ne’e kada loron sira simu bee durante oras ne’e ka 12 agora redús ba oras haat no rua tanba bee iha rai okos menus,” Prezidente Konsellu Administrasaun esplika.

Maski nune’e, Prezidente BTL, E.P  orgullu ho sidadaun balun tanba durante ne’e la dada bee ilegál no kontribui selu maibé maioria mós komete dada ilegál, lakohi kontribui.

“Ami kontinua halo sosializasaun hodi konsensializa komunidade hodi kontribui atubele fornese bee di’ak liu ba komunidade tanba sein kontribuisaun susar ba ami atu atinje objetivu ‘Bee to’o ba ema hotu’, maski mai ho sistema modernu tebes maibé sein kontribuisaun sei labele,” nia dehan.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!