Top

Disputa rai Marconi, Governu fó prazu loron 30 ba okupante hapara atividade

Rai Marconi. Imajen Tatoli/Francisco Sony

DILI, 06 outubru 2022 (TATOLI)—   Governu liuhosi Ministériu Justisa (MJ), hasa’i ona despaisu ba okupante ka rekerrente kona-ba estatutu rai iha aldeia 04, Marconi, iha klínika 333 nia-oin, suku Fatuhada, postu administrasaun Don-Aleixo, munisípiu Dili, ho prazu loron 30 atu hapara atividade ne’ebé halo ona iha rai Estadu refere.

“Semana kotuk, ami fó tan despaisu ba parte rekrrente kona-ba rai área Marconi nian atu tenke hapara sira nia atividade, tanba rai ne’e Estadu nia,” hateten Vise Ministru Justisa, José Edmundo Caetano ba Agência TATOLI iha Parlamentu Nasionál, kuarta ne’e.

Notísia relevante: MJ-PNTL sei hapara atividade konstrusaun iha rai Estadu área Marconi

Iha despaisu ne’e, Governante ne’e dehan Ministériu Justisa fó prazu loron 30 atu ema ne’ebé deklara rai ne’e sira nian tenke hadook-aan husi fatin ne’e no labele halo tan atividade ruma iha fatin ne’ebá.

“Ami fó prazu loron 30 para ema ne’ebé deklara katak rai ne’e sira nian, tenke hadook aan husi fatin ne’ebá no labele halo tan atividade iha fatin ne’ebá, kuandu sira la kumpre ami sei uza forsa liuhosi akompaña hosi polísia hodi sobu lutu sira ne’e,” nia afirma.

Tanba , nia dehan lei fó dalan uza atu Governu uza forsa liuhosi akompaña hosi polísia hodi ezekuta despaisu administrativu, bainhira okupante rai Estadu ida la kumpre lei.

“Sira atu iha sertifika orijinál ka la orijinál ne’e depende ba tribunál nia desizaun atu haree sei haree ba kestaun legalidade nian,” afirma Governante ne’e.

MJ submete ona despaisu ba Polisia Nasionál Timor-Leste (PNTL), atu hapara atividade konstrusaun hosi sidadaun balun iha rai Estadu área Marconi tanba konsidera fatin ne’e nu’udár propriedade Estadu.

MJ halo despaisu hapara atividade konstrusaun iha rai Estadu área Marconi ne’e ho baze ba relatóriu hosi Gabinete Inspensaun Auditoriál (GIA) katak rai iha Klínika 333 nia oin ne’e propriedade Estadu no empreza balun mak arrenda, maibé la selu arrendamentu.

Tanba estatutu rai iha área Marconi ne’e pretense ba rai Estadu tanba ne’e iha mandatu Sekretáriu Terra Propriadade Jaime Xavier halo kontratu arrendamentu ho kompañia ida atu uza rai Marconi ba fatin negósiu hahú tinan 2017 to’o 2022.

Nune’e, kontratu arrendamentu ne’ebé kompañia selebra ho governu ramata ona fulan-maiu 2022 no seidauk iha renovasaun kontratu ba fatin ne’eba. Empreza selu arrendamentu fulan tolu de’it restu nia la selu hodi hamosu divida rihun $36-resin.

MJ mós  hatama ona partisipasaun ba Ministériu Públiku ba arrendatáriu hirak ne’ebé la kumpre dever, inklui terrenu ne’ebé sai polemika dadaun iha Marconi ne’e,” Ministru informa.

Tanba ne’e, sidadaun balun ne’ebé hala’o atividade iha ne’eba laiha koñesimentu husi MJ, nune’e halo notifikasaun ba individu ne’ebé atu okupa rai Marconi atu sai nonok ho di’ak. Se notifikasaun dahuluk ne’e maka parte sira la kumpre, ne’e hatudu prova momoos katak, ema sira ne’e hamosu ona aktu seluk.

Daudaun, MJ laiha koñesimentu ba sidadaun estrajeiru ne’ebé halo atividade konstrusaun iha rai Marconi ne’e no laiha koñesimentu hosi Trade Investe, tanba halo fali kontratu arrendamentu partikular ho ema privadu, ne’ebé laiha sertifikadaun na’in-ba rai “hak milik” hanesan baze legól mós laiha.

Disputa rai iha Marconi ho metru 50 hosi tasi ibun ne’e, tuir lei ne’e rai Estadu nian, ho ida ne’e laiha razaun ema ida atu hada’u katak ne’e rai privadu.

Notísia relevante: Komunidade Marconi husu Governu buka solusaun ba disputa rai

Jornalista: Natalino Costa

Editór      : Florencio Miranda Ximenes  

Publisidade

Leave a Reply

Latest Post

error: Content is protected !!