DILI, 07 outubru 2022 (TATOLI)–Governu liuhosi Diresaun Jerál Estatístiku (DGE, sigla portugés) Ministériu Finansa (MF), Sekretaria Estadu Formasaun Profisionál no Empregu (SEFOPE), serbisu hamutuk ho Univerdade Flinders hosi Austrália, sei halo peskiza ba osan sira hosi traballadór sazonál timor-oan ne’ebé serbisu iha Austrália no Koreia.
“Objetivu peskiza atu hatene oinsá traballadór timor-oan ne’ebé serbisu iha Austrália no Koreia, osan ne’ebé sira simu haruka mai Timór halo saida de’it, ajuda ekonomia família hanesan fó eskola ba membru família ka hadi’a uma. Aleinde ne’e peskizadór sira sei halo entrevista ho uma-kain sira ne’ebé ninia oan laiha ida mak ba serbisu iha rai-li’ur. Nune’e bele halo komparasaun, sira ne’ebé serbisu iha rai-li’ur ho sira ne’ebé la bá,” Diretór Jerál Estatístika, Elias dos Santos Ferreira, informa ba Agência Tatoli, iha ninia knaar fatin, Caicoli, sesta ne’e.
Notísia relevante: Traballadór Austrália-Korea Sul Hatama ona Osan U$25,693,096.48
Molok tun ba terrenu hodi halo peskiza, peskizadór hamutuk na’in-20 tuir uluk formasaun durante loron-rua, 07 to’o 08 outubru, ne’ebé fasilita hosi DGE, SEFOPE no Universidade Flinders, iha salaun DGE, Caicoli.
Antes ne’e, DGE ho kolaborasaun Universidade Flinders, halo ona pilotu molok COVID-19, loloos peskiza ne’e hala’o iha tinan 2020 maibé tanba pandemia COVID-19, entaun muda fali mai tinan ne’e.
Tuir responsável ne’e, peskiza importante tebes tanba iha pergunta balun liga ba moris di’ak kada uma-kain.
Hafoin ramata formasaun, hahú loron 10 outubru ne’e sira bele tun ona ba munisípiu sira hodi halo peskiza durante fulan-ida.
“Peskiza ne’e fasil tanba dadus traballadór sira ne’e fasilita hosi SEFOPE, halo selesaun traballador sira, ne’ebé iha uma-kain 1.200 mak peskizadór sira sei vizita,” nia dehan.
Jornalista : Antónia Gusmão
Editora : Julia Chatarina
