iklan

NASIONÁL, EDUKASAUN, DILI, HEADLINE

DNASE prepara materiál emerjénsia ba eskola EBF Ai-Tura ne’ebé anin sobu

DNASE prepara materiál emerjénsia ba eskola EBF Ai-Tura ne’ebé anin sobu

Diretór Nasionál Asaun Sosiál Eskolár ne’ebé trata Asuntu Sanitária hosi MEJD, Joaquim Martins. Imajen Tatoli/Egas Cristóvão

DILI, 09 setembru 2022 (TATOLI) – Diretór Nasionál Asaun Sosiál Eskolár (DNASE), Joaquim Martins, informa diresaun prepara ona ekipa ida atu ba halo verifikasaun iha eskola ensinu báziku filiál (EBF) Ai-Tura, Munisípiu Ermera ne’ebé anin sobu iha loron 5 outubru 2022 liu-ba, hafoin ne’e mak atribui material emerjénsia, tanba simu ona orientasaun hosi Ministru Edukasaun Juventude no Desportu.

Joaquim Martins simu ona orientasaun verbál hosi ministru. Ne’e duni hanesan ema tékniku nia mós prepara ona ekipa hodi ba halo verifikasaun hodi haree direta kondisaun atuál eskola refere atu nune’e diresaun bele apoiu imediatu materiál emerjénsia tuir duni kondisaun ne’ebé iha.

“Ha’u simu ona orientasaun hosi Ministru no agora ha’u tenta ona halo koordenasaun ho parte munisípiu atu bele envia informasaun urjente mai diresaun atu ita bele halo buat ruma. Tanba ita hotu hatene ezame besik ona ita tenke apoiu lalais materiál emerjénsia ba eskola ne’ebá. maibé ita presiza hetan uluk informasaun ida klaru atu bele halo verifikasaun”, Joaquim Martins, hateten ba jornalista ajénsia Tatoli, via-telefone, domingu ne’e.

Maibé nia haktuir dezastre naturál ne’ebé akontese iha eskola EBF Ai-Tura paralelo Kolimate Lalimlau ne’ebé lokaliza iha munisípiu Ermera Postu Administrativu Ermera Suku Estadu, Aldeia Tasaquina, ne’e loos duni. anin sobu tiha edifísiu eskola ida ho sala aula tolu. agora diresaun ninia esforsu maka atu hatene gravidade eskola ne’e rasik atu bele hetan apoiu emerjénsia ho lalais.

“Ita la hanoin dezastre hanesan ne’e atu akontese maibé buat hotu liu ona tan ne’e ita husu ba parte eskola atu kontinua hakmatek atu ita bele halo esforsu ho rekursu ne’ebé ita iha bele responde ho lalais materiál emerjénsia sira mai eskola ne’e”, katak.

Enkuantu edifísiu eskola EBF Ai-Tura primeiru no segundu síklu ne’ebé anin sobu ona, durante ne’e halibur estudante na’in 157 inklui profesór na’in 8 kompostu hosi profesór permanente ida, profesór kontratadu tolu no profesór voluntáriu na’in haat.

Jornalista: Tomé Amado     

Editór : Zezito Silva 

iklan
iklan

Leave a Reply

iklan
error: Content is protected !!