DILI, 09 setembru 2022 (TATOLI) – Diresaun Servisu Edukasaun Munisípiu Baucau tinan ne’e kontinua implementa programa merenda eskolár ba estudante nivél Pre-eskolár no ensinu báziku na’in 32.558 ho orsamentu hamutuk $714,187.00.
Diretór Servisu Edukasaun Munisípiu Baukau, Augusto Ornai Ximenes, hateten programa merenda eskolár iha Munisípiu Baucau realiza ona ba estudante hamutuk 32.558 ne’ebé kompostu hosi estudante Pre-eskolár na’in 1.341 no estudante ensinu báziku na’in 31.217.
Tuir nia katak orsamentu programa merenda eskolár ne’ebé gasta ba estudante hamutuk 32.558 ne’e hamutuk $714.187.00, orsamentu sira ne’e kompostu hosi nível pre-eskolár iha $49.457.00 no ensinu báziku iha $664.730,00
“Hosi totál orsamentu ne’ebé ita simu hodi gasta ba programa merenda eskolár ne’e hetan ona kalkulasaun kada estudante ida kuartér (0,025) no mós programa merenda eskolár ne’e rasik ita implementa tuir loron efetivu. Ne’ebé ita iha loron 70 efetivu hodi implementa programa merenda eskolár ba estudante sira”, Augusto Ximenes hateten ba jornalista ajénsia Tatoli hosi via telefone, domingu ne’e.
Nia mós haktuir katak programa merenda eskolár ne’ebé implementa iha Baucau ne’e la’o tuir rekezitu ne’ebé deside ona hosi Ministériu relevante sira mak hanesan menu ba merenda eskolár ne’e kumpre nafatin menu ne’ebé deside ona hosi Ministériu Saúde.
Maibé diretór ne’e informa katak parte eskola sira mak sei deside ninia implementasaun oinsá naran katak la bele kontra fali desizaun Governu nian kona ba menu ne’ebé deside ona. portantu programa merenda eskolár ne’e rasik implementa mós ba eskola públiku no privadu sira hotu.
Jornalista: Tomé Amado
Editór : Zezito Silva
