CNE prevee millaun 10-resin iha proposta OJE 2023
DILI, 10 outubru 2022 (TATOLI)-Komisaun Nasionál ba Eleisaun (CNE, sigla portugés), prevee $10,270,722 iha proposta Orsamentu Jerál Estadu (OJE).
“Ohin, ami hato’o orsamentu CNE ba tinan oin millaun $10-resin”, Prezidente CNE, José Agostinho da Costa Belo, ba jornalista hafoin audénsia públika ho komisaun A ne’ebé trata asuntu Justisa no Konstituisional iha Parlamentu Nasionál, segunda ne’e.
Nia hatutan, hosi orsamentu ne’e aloka millaun $4 iha CNE hodi ezekuta programa sira ne’ebé planea no millaun $6 aloka ba subvensaun públika ba partidu polítiku sira.
Prezidente CNE ne’e hatutan tan bazea ba tetu fiskál ne’ebé atribui ba instituisaun ne’e la kobre atividade, liuliu iha eleisaun parlamentár iha tinan oin presiza realiza eleisaun ne’ebé di’ak no transparensia ho demokrátiku liután mak presiza ho supervizasaun di’ak, nune’e CNE husu tan orsamentu adisionál.
“Nune’e ami hato’o aumenta tan millaun $2.3 hodi halo rekrutamentu ba ita-nia ofisiál ne’ebé sei koloka iha sentru votasaun ho estasaun votu, ne’ebé resposta komisaun nian pozitivu loos”, katak nia.
Tuir livru anexu XI planu anuál ba serbisu no entidade setór públiku administrativu ba 2023, CNE iha programa boa-governasaun no jestaun instituisional ho sub-programa boa-governasaun ho atividade ida, sub-programa jestaun instituisional ho atividade lima, sub-programa parseria ho atividade alarga parseria kooperasaun.
Sub-programa supervizaun rejistu sidadaun no operasaun eleitorál ho atividade supervizaun rejistu eleitór sistema baze dadus, sub-programa rekursu umanu afetu prestasaun serbisu ho atividade ida.
Sub-programa promove esklaresimentu kona-ba aktu eleitorál ho atividade hanesan semináriu, workshop, debate, talkshow no konferénsia aktu eleitorál, atividade divulga informasaun ba eleitór kona-ba aktu eleitorál liuhosi meiu komunikasaun sosiál, atividade estabelesimentu sentru edukasaun sívika.
Tuir portál Ministériu Finansa (MF), iha segunda ne’e (10/10/2022), fó sai CNE nia OJE 2022 ho orijen $12,421,584.00, kompromisu sira $00, obrigasaun sira $99,229.58, atuál $11,754,333.22, saldu $568,021.20 no ezekusaun 95.4%.
Notísia relevante: OJE 2022, CNE husu adisionál rihun $900
Jornalista : Nelson de Sousa
Editora : Rita Almeida
