DILI, 11 outubru 2022 (TATOLI)– Diretór Jerál ba Asuntu Protokolu no Konsular Ministériu Negosiu Estranjeiru no Kooperasaun (MNEK), José António Amorim Dias, informa International Organization Migration (IOM) hakarak ajuda no repatria timor-oan sira ne’ebé terus hela iha Portugál.
“Embaixada Timor-Leste iha Portugal mós halo enkontru ho OIM no UN atu buka solusaun hodi husu ba timoroan sira ne’ebé mak iha Portugal atu fila ho voluntáriu. IOM husu ba maluk timor-oan sira ne’ebé mak haree situasaun iha Portugál ladi’ak no hakarak fila-fali mai Timor-Leste, ajência internasionál ne’e sei fasilita repatria, maibé ho forma voluntáriu,” dehan Diretor ne’e ba Agência TATOLI iha edifisiu MNEK, tersa ne’e.
Nune’e, MNEK husu ba sidadaun ne’ebé terus hela iha Portugál no hakarak mai fai Timor bele hakbesik aan ba IOM hodi halo repatriasaun.
Tuir dadus ne’ebé MNEK rekolla timor-oan ne’ebé daudaun hela iha Portugál hamutuk 5000, hosi númeru ne’e na’in-20 tenta atu tama ba Inglaterra, maibé imigrasaun Inglaterra haruka fila-fali bá Portugál.
“Hanesan ita hatene katak ita nia jovens sira ne’e maioria mak hola billete iha ajénsia oioin no fasilita sira ba Portugál ho intensaun ida katak atu oferese servisu ba sira, maibé infelizmente situasaun laloos, sira to’o tiha Portugal mak hasoru situasaun defisil,” nia afirma.
MNEK kontinua koordena ho Embaixada sira iha rai li’ur atu akompaña no tau matan ba sidadaun sira ne’ebé hetan difikuldade iha ema nia rain.
“Kuaze loro-loron hala’o koordenasaun ho Embaixadór iha Portugál hodi tau matan ba sidadaun sira liuliu buka tuir ita nia sidadaun sira ne’e, hodi halo rejistu ba sira hotu hodi hatene ema nain hira mak iha Portugál no atu buka hatene sira nia hela fatin (paradeiru),” nia relata.
Kona-ba timor-oan sira ne’ebé toba iha jardím, Diretór ne’e dehan, iha semana kotuk, ekipa embaixada tuun direta halo observasaun iha jardím sira no komunika direta ba prezidente kamara munisipál Lisboa hodi lori sai ona ba fatin seguru.
“Atualmente autoridade Portugál lori ona timor-oan sira ba fatin seguru iha Lisboa, nune’e laiha ona timoroan mak toba iha jardín. Maibé problema timor-oan balun ba servisu tiha iha empreza, hafoin iha konflitu baku malu ho sidadaun Pakistaun no Indianu, mak halai sai husi empreza no buka kost baratu hodi aluga, maibe ema lakohi fó,”
Jornalista: Hortencio Sanchez
Editór : Florencio Miranda Ximenes
