Top

Kazu osan $130.000, MP hahú halo validasaun hodi submete ba Tribunál

Prokuradór Jerál Repúblika (PJR), Alfonso Lopes, ohin simu pose hosi Prezidente Repúblika, Francisco Guterres Lú Olo, iha Palásiu Prezidente Bairru Pité. Imajen António Goncalves

DILI, 13 outubru 2022 (TATOLI)— Prokuradór Jerál Repúblika (PJR), Alfonso Lopez hateten, kazu osan fíziku ho montante $130.00 ne’ebé autoridade polisiál hala’o apreensaun iha Aeroportu Internasionál Prezidente Nicolau Lobato, tersa (04/10), iha  hela prosesu validasaun no promosaun hodi submete ba Tribunál.

“Ba kazu ne’e nia prosesu la’o hela. Tanba kazu ne’e autoridade polisiál sira halo ona apreensaun no halo inkeritu, nune’e remete mai Ministériu Públiku nu’udar nain ba asaun penál hodi haree no halo validasaun inklui promosaun, antes enkamiña ba Tribunál”, hateten Prokuradór Jerál Repúblika(PJR), Alfonso Lopez,  ba jornalista sira  iha Parlamentu Nasionál, kinta ne’e.

Notísia relevante: Polémika osan $130.000, PM Taur fó fiar ba investigasaun

Autoridade polisiál  PCIC no SNI foin lalais halo apreensaun ba osan ho montante $130.000 iha aeroportu, ne’ebé deskonfia hosi membru partidu balun atu lori bá rai-li’úr, maibé tanba montante osan ne’e liu $10.000, nune’e ekipa servisu intelejénsia halo apreensaun hodi submete ba justisa.

“Ita hein de’it, tanba kazu ne’e sei iha hela prosesu validasaun. Tanba ne’e husu  ba ita hotu tenke asegura segredu justisa,” nia sujere.

Entretantu, rejime jurídiku ba prevensaun no kombate brankeamentu kapitál no finansiamentu terrorizmu haktuir iha lei númeru 17/2011 ne’ebé publika iha 28 dezembru ho lei n.º 5 /2013/III primeira alterasaun ba lei númeru 17/2011, 28 dezembru.

Devér jerál iha artigu 7 ne’ebé ko’alia konaba obrigasaun deklara osan, alínea 1 hatete sé de’it ne’ebé tama no sai hosi teritóriu Timor hodi lori no hatama osan ho montante $10.000,00 ou liu tenke deklara ba autoridade alfándega.

Alínea 2. Kopia hosi deklarasaun ne’e, imediatamente alfándenga sei haruka ba Unidade Informasaun Finanseira iha Banku Sentrál Timor-Leste (BCTL, sigla portugés). Alínea 3 esplika autoridade alfándenga sei halo apreensaun ba osan ne’ebé la halo deklarasaun no halo deklarasaun falsa tanba konsidera ba suspeitu brankamentu kapitál ou finansiamentu ba terrorizmu.  Alínea 4 hatete autoridade judisiál mak iha kompetensia hodi apresia ho prazu másimu loron tolu. Alínea 5 autoridade judisiál mak iha kompetensia hodi deside, hodi konfirma sirkunstánsia hosi karaterístika valór ne’ebé autoridade apreende.

Nune’e, iha Kódigu penál Timor-Leste iha artigu 313 ne’ebé ko’alia kona-ba brankeamentu ba kapitál. Nune’e iha Alínea 1 hatete ema ne’ebé, maski hatene katak bem ka produtu ruma mai hosi krime terrorizmu, tráfiku ho arma ka produtu nukleár, ema nia tráfiku ka venda, pornografia ho menór, korrupsaun, burla ka extorsaun, fraude fiskál, tráfiku ho espésie protejida no tráfiku ho órgaun ka tesidu umanu ka krime grave seluk tan, ne’ebé ema ruma komete, ho kompartisipasaun oin naran ida, no fó-fatin ba pena ho limite mínimu aas-liu prizaun tinan 4.

Kódigu penál Timor-nian artigu 133 ko’alia konaba finansiamentu ba terrorizmu esplika, ema ne’ebé, ho meiu naran ida, diretamente ka indiretamente no intensionalmente, fornese, rekolle ka detein fundu ka bem naran ida no mós produtu ka direitu ne’ebé bele transforma ba fundu, buka atu hetan bem, fundu, produtu ka direitu sira-ne’e, ho intensaun atu uza ka hatene katak bele uza, totalmente ka parsialmente, hodi planeia, prepara ka pratika aktu sira-ne’ebé artigu 131, númeru 1, prevee ka prátika aktu sira-ne’e ho intensaun referida iha artigu 132, númeru 1, sei hetan pena prizaun tinan 12 to’o tinan 25.

Notísia relevante: Membru PN husu prosesa membru Governu interven serbisu investigasaun

Jornalista: Natalino Cota

Editór       : Florencio Miranda Ximenes

Publisidade

Leave a Reply

Latest Post

error: Content is protected !!