DILI, 13 outubru 2023 (TATOLI)— Tribunál Rekursu (TR), iha proposta Orsamentu Jerál Estadu (OJE) 2023 prevee orsamentu ho montante $7.516.068, hodi implementa lei organizasaun judisiáriu foun, liuliu foku ba harii Supremu Tribunál Justisa, Tribunál Distritál iha kada munisípiu.
“Orsamentu 2023 ida ne’e ho montante $7.516.068, ita fó prioridade ba implementa lei organizasaun judisiaria foun, liu liu atu harii tribunál instásia tolu hanesan Supremu Tribunál Justisa, Tribunál Rekursu no Tribunál Distritál iha kada munisípiu iha tinan oin,” hateten Prezidente Tribunál Rekursu (PTR), Deolino dos Santos, bainhira ramata audénsia públiku ba Orsamantu Jerál Estadu (OJE) 2023 ho Komisaun A iha Parlamentu Nasionál, kinta ne’e.
Atu implementa lei organizasaun judisiáriu foun presiza rekursu umanu ne’ebé barak, infra-estrutura, liuliu atu konstrui Tribunál Distritál iha munisipiu tolu, ne’ebé iha ona faze dezeñu detalladu.
Iha OJE 2023, Tribunál Rekursu mós husu tan osan adisionál $400.00 balun atu alarga ka konstrui tan edifisiu Tribunál Rekursu.
Tribunál Rekursu iha tinan ne’e iha programa serbisu tribunál ba populasaun prevee osan $5,958,298, ho nia sub-programa hanesan jestaun institusionál $1,361,790, jestaun finanseira no administrasaun, lojistika $1,324,790, atividade planeamentu, monitorizasaun $6.000, formasaun no kapasitasaun rekursu umanu $6.000, komunikasaun divulgasaun $25.000, programa asesu ba justisa $188,980, Boa Governasaun $1,368,790.
Notísia relevante: Tempu To’o Ona Harii Supremu Tribunál Justisa
Jornalista: Natalino Costa
Editór : Florencio Miranda Ximenes
