DILI,13 outubru 2022 (TATOLI)— Servisu Autonómu Medikamentu no Ekipamentu Saúde (SAMES), prevee milliaun $9.235.500 iha Orsamentu Jerál Estadu 2023.
“Ita prevee millaun $9.235.500 iha OJE 2023, hodi kobre ba salariu no vesimentu, bens servisu kapitál menor no kapitál dezenvolvimentu. Kona-ba asuntu operasionál sira ne’e ami ladun kestiona, maibé ami sempre foti no aprezenta ita nia situasaun no alokasaun orsamentu ba iha kompra medikamentu, nune’e prevee ba kompra medikamentu hamutuk millaun $5,5”, Diretór Ezekutivu SAMES Santana Martins, hateten iha Parlamentu Nasionál, kinta ne’e.
Nia dehan, ho orsamentu milliaun $5,5 atu sosa medikamentu ne’e la sufisiente tanba kada tinan nesesidade aumenta.
“Orsamentu milliaun $5.5 atu kompra medikamentu ne’e todan ida ba ami atu responde nesesidade ne’ebé mak tinan aumenta, hanesan sosa, asesores, instrumentu sira, selu eletrisidade, manutensaun, distribuisaun, asegura kualidade aimoruk,” katak.
Iha Orsamentu Jerál Estadu 2022 aloka $9.235.500, daudaun SAMES ezekuta ona 29.7% no atuál obrigasaun iha 65.3%, hahú sura hosi komitementu hamutuk 92,1%.
Hanesan haktuir iha livru anexu XI planu anuál ba servisu no entidade setór saúde publiku administrativu ba tinan 2023, mak SAMES iha programa númeru 510 ho atividade sia no sub-programa haat mak hanesan boa-governasaun, jestaun instituisionál, jetaun ekipamentu no médikamentu no medika farmásiutika.
Jornalista : Felicidade Ximenes
Editór : Florencio Miranda Ximenes
