OJE 2023: INS prevee milliaun $1,2 hodi finansia programa rua
DILI,14 outubro 2022 (TATOLI)— Institutu Nasionál Saúde (INS), prevee $1.159.079 iha Orsamentu Jerál Estadu (OJE) 2023, hodi finansia ba programa governasaun di’ak no jestaun instituisionál saúde.
“Orsamentu 2023 ida ne’e, ami nian planu atu halo programa boot rua, hanesan Governasaun di’ak no institusionál saúde,” Diretór Interino Instituto Nasionál Saúde, Lucio Babo, dehan bainhira halo audénsia ho komisaun F Parlamentu Nasionál, kinta ne’e.
Ho orsamentu 2023 ne’ebé prevee $1.159.079, ba programa boa governasaun ne’e tuir estimasaun sei gasta 28,35% no instituisionál saúde mak 71,65%.
“Ami iha sub programa neen,hanesan boa governsaun, jestaun intituisionál, parteira, dezenvolvimentu ba rekursu umanu, peskiza dezenvolvimentu saúde no planu kapasitasaun”, katak.
Kona-ba progresu ezekusaun OJE 2022, nia afirma Institutu Nasionál Saúde, iha orsamentu $1.030.292, ne’ebé ezekuta ona montante $629.957 ka atinje ona 63%, ba obrigasaun ezekuta ona rihun $74-resin, ba komitementu sira kuaze rihun $20 ka 2%, no balansu ne’ebé mak sei iha hamutuk $282.141 ka 27% .
Planu ezekusaun orsamentu ba iha trimestre ida ne’e, liuliu ba saláriu no desimu terseiru sira ba funsionáriu hamutuk 60 no mós ba kargu xefia sira ho montante hamutuk $130.038,52 inklui halo atendimentu formasaun ba profisionál saúde sira.
Nune’e mós halo pagamentu ba liña eletrisidade, telemovel no halo manutensaun sira hamutuk $27.200 , husi ne’e balansu $53.101,49.
“Ami nia estimasaun katak ba trimestre dahaat bainhira implementa hotu mak ezekusaun orsamentu bele atinji 95% ho balansu 5%,” nia afirma.
Planu Ezekusaun OJE 2022 ba trimestre dahaat mak atividade esensiál sira hanesan fó formasaun ba profisionál saúde husi nivel nasionál too’ iha sentru saúde sira.
“Ami mós hamutuk ho parseiru dezenvolvimentu sira komesa hahú fó treinamentu ba profisionál saúde sira kona-ba vasina PCV no mós kampaña ba sarampu, rubeóla, polio no vitamina A”, katak.
Hanesan haktuir iha livru anexu XI planu anuál ba servisu no entidade setór saúde públiku administrativu ba tinan 2023, Institutu Nasionál Saúde iha programa 510, sub-programa neen no atividade 17.
Jornalista : Felicidade Ximenes
Editór : Florencio Miranda Ximenes
