DILI, 14 outubru 2022 (TATOLI)— Ministériu Justisa (MJ) prevee $13.802.719, atu mellora atendimentu púbiku iha área trata bellete identidade no sertidaun moris no prioridade seluk tan.
“Orsamentu iha 2023 ne’e hamutuk milliaun $13, hodi finánsia programa no atendimentu hanesan halo billete identidade, sertidaun moris no seluk. Ita tenke tuun direta ba sidadaun sira iha idak-idak nia fatin ba kada postu adminitrativu, durante loron sanulu (10) hodi fasilita trata sira nia dokumentu”, hateten Ministru Justisa Tiago Amaral Sarmento ba jornalista sira, hafoin audénsia públiku kona-ba Orsamantu Jerál Estadu (OJE) 2023 ho Komisaun A iha Parlamentu Nasionál, kinta ne’e.
Iha tinan oin, MJ sei halo mós manutensaun ba fargo ka mákina produsaun billete identidade iha munisípiu lima ne’ebé maka daudaun ne’e avaria hela.
Perante audénsia orsamentál ne’e, MJ mós husu Deputadu sira Komisaun A atu halo alterasaun ba estatutu Defensoria Públika ba iha autonÓmia finansira administrativa, nune’e Defensória Públiku bele jere sira nia osan rasik.
Tanba daudaun ne’e lei organizasaun judisiáriu foun obriga Defensoria Públika halo nia kna’ar to’o iha munisípiu sira hodi lori besik liután justisa ba sidadaun sira.
Ministru Tiago relata mós ba Deputadu sira atu apoia serbisu Komisaun Terras no Propriedade nian atu fortalese nia serbisu. Tanba Governu kria tinan kotuk atu harii edifisiu ba sira hodi bele halo serbisu di’ak.
“Serbisu Notariadu, Terras no Propriadade ne’ebé hatama ona reseita ba Estadu, nune’e husu Deputadu atu apoia serbisu notariadu Diresaun Terras Propridade, nune’e iha futuru bele mellora serbisu di’ak liután,” nia sujere.
Orsamenti tinan fiskál 2023, Ministériu Justisa prevee $13.802.719 hodi finansia ba programa hanesan Reformas Estadu $335.528, Sub-programa mak Kuadru legál alokadu ho $74.748, Ordenamentu Jurídiku no Sistema Judisiál entra no vigór $74.748, Sub-programa Konsolisaun Lejizlativa $260.780 no programa asesu justisa $9.204.182.
Enkuantu, Sub-programa dezenvolvimentu área téknika espesífika $228.212, reinsersaun sosiál $41.000, duasaun ba padraun detansaun reinsersaun sosiál liuliu ba prisioneiru sosiál mak $41,000, sub-programa serbisu prisionál $2.659.77 serbisu kadastrál $218.706, sub-programa jestaun terras no propriedade $1.891.709, jestaun informasaun jeopolitika espesiál $19.000, sub- programa reistu notariadu $116.016, sistematisaun rejistu notariadu $116.016, sub-programa identikasaun sivil no rejistu kriminál $1.697.018.
Programa boa governasaun no institusionál $4,253, sub-programa boa governasaun $653,502, programa igualdade jeneru inkluzaun sosiál $9,960, sub-programa implementasaun rezolusaun 1325 (2000) $2.590.
Jornalista: Natalino Costa
Editór : Florencio Miranda Ximenes
