Eskola 66 iha munisípiu tolu hetan ona instalasaun internet

DILI, 17 outubru 2022 (TATOLI)–Ministériu Edukasaun Juventude no Desportu (MEJD) instala ona liña internet ba eskola hamutuk 66 iha munisípiu tolu ho orsamentu retifikativu $800,000 ne’ebé hetan apoiu hosi kooperasaun servisu entre operadór Telekomcel no Telemor.

“Ita iha planu atu estabelese internet ba eskola ensinu báziku no ensinu sekundáriu inklui eskola tékniku vokasionál hamutuk 206 iha munisípiu tolu Dili, Baukau no Bobonaru. Hosi eskola 206 ne’ebé tama iha ita nia planu ne’e agora konsege instala ona eskola 66”, Armindo Maia hato’o asuntu ne’e ba jornalista sira iha salaun enkontru MEJD Vila Verde, segunda ne’e.

Ministru Armindo esplika hosi eskola 66 ne’ebé hetan ona instalasaun internet ne’e sei falta eskola hamutuk 140 maka seidauk instala. Hein katak to’o fulan ikus tinan ne’e remata eskola 206 ne’e bele hetan hotu ona instalasaun liña internet.

Nia hatutan, planu ministériu nian hodi halo instalasaun liña internet ba eskola sira ne’e, tanba nesesidade. Mundu tama ona iha kompetisaun, ema hotu iha obrigasaun asesu no hetan informasaun sira ho lalais.

Tanba ne’e, VIII governu konstitusionál liuhosi MEJD tau prioridade hodi apoiu liña internet ba eskola sira hosi nivel ensinu báziku to’o sekundáriu jerál, tékniku vokasionál atu tulun profesór no estudante sira bele hetan koñesimentu liuhosi meiu sira hanesan ne’e.

“Ohin loron buat ida teknolojia informasaun no komunikasaun ne’e la loos ona, opsaun ida maibé ne’e hanesan nesesidade ida ona”, tenik nia.

Maibé nia rekoñese to’o oras ne’e liña internet iha Timor-Leste sei hasoru problema, tanba limitasaun sira halo internet la’o hanesan lenuk. Maibé ministériu iha kompromisu depois operadór sira kuandu instala hotu ona sira sei buka mekanizmu oinsá halo kontrolu atu labele uza fali fasilidade sira ne’e ba buat seluk.

Ekipa tékniku MEJD nian sei servisu atu fó esplikasaun ba profesór no dirijente sira iha baze konaba oinsá bele uza internet ho didiak no responsabilidade, no ministériu sei diskute ho ajénsia dezenvolvimentu UNDP oinsá bele halo intervensaun hodi buka identifika eskola 100 hanesan ne’e atu rezerva mós sala ida ba IT nian.

Notísia relevante: Eskola 1.008 sei hetan servisu asesu internet hosi Governu

Jornalista       : Tomé Amado

Editora           : Rita Almeida