PGR fó pose ba KPRPI na’in-haat

DILI, 17 outubru 2022 (TATOLI)—Prokuradór Jerál Repúblika (PGR, sigla portugés), Alfonso Lopez, segunda ne’e, fó pose ba Prokuradór-Repúblika Koordenadór Prokuradoria Repúblika Primeira Instánsia (KPRPI) ba munisípiu Dili, Baukau, Suai no Rejiaun Administrativu Espesiál Oe-cusse-Ambeno (RAEOA).
Nomeasaun ne’e bazeia ba lei númeru 7/2022, ne’ebé publika iha loron 19, fulan-maiu, estatutu Ministériu Públiku-nian. Koordenadór prokuradoria sira ne’e maihosi kareira prokuradór primeira klase.
Jacinto Babo Soares, Koordenadór Prokuradoria Repúblika Primeira Instánsia Dili, Nelson Carvalho Koordenadór Prokuradoria Repúblika Primeira Instánsia Baucau, Pascásio de Rosa Alves Koordenadór Prokuradoria Repúblika Primeira Instánsia Suai no Mateus Nessi Koordenadór Prokuradoria Repúblika Primeira Instánsia RAEOA.
“Ho nomeiasaun sira ne’e, emposadu sira bele hahú toma sira nia responsablidade iha kada prokuradór primeiru instansia nian no kontinua enkoraja atu serbisu ho profisionál”, hateten nia hafoin toma pose iha edífisiu PGR-Dili.
Nia dehan, maske halo ona nomeasaun, maibé kontinua enfreta menus rekursu umanu atu kompleta estrutura iha nivél prokuradór rekursu no prokuradór primeiru instánsia inklui ofisiál Ministériu Públiku nian iha munisípiu 13 inklui RAEOA.
Tanba ne’e, nia husu ba komisaun A iha Parlementu Nasionál atu apoia serbisu Ministériu Públiku-nian, liuliu oinsá tau osan ne’ebé sufisiente ba Sentru Formasaun Jurídiku no Judisiáriu Ministériu Justisa hodi loke formasaun urjente ba formandu sira, nune’e bele halo rekrutamentu ba kareira prokuradór foun sira, hodi bele mellora serbisu iha futuru tuir estatutu MP.
“Ha’u hanoin Parlamentu Nasionál apoia ida ne’e no sira sei haree iha diskusaun orsamentu tinan oin”, nia afirma.
Testu diskursu ne’ebé TATOLI asesu haktuir, liuhosi proposta prokuradór jerál iha reuniaun fulan-agostu no setembru 2022, Konsellu Superior Ministériu Públiku (KSMP) halo nomeasaun iha fulan-agostu mak Sekretariu Jerál ba Prokuradoria Jerál Repúblika, Gil da Conceição Savio, Adjunta Sekretariu Jerál, Anabela Lesu, Xefe Gabinete Prokuradór Jerál, Carlito Armindo Sousa.
Nomeasaun iha fulan setembru mak Diretora Gabinete Sentral Kombate Korrupsaun no Krime Organizada, adjunta prokuradór jerál, Remizia de Fátima da Silva inklui Koordenadór Prokuradoria Repúblika Primeira Instánsia ba munisípiu haat.
lei númeru 7/2022, ne’ebé publika iha loron 19, fulan-maiu, artigu 18 ko’alia konaba orgaun sira iha ministériu públiku mak hanesan a) prokuradoria jerál repúblika, b) prokuradoria repúblika ba rekursu c) prokuradoria repúblika ba primeira instáncia d) prokuradoria repúblika ba administrativa no fiskál ba primeira instánsia.
Notísia relevante: PJR fó pose ba ofisiál MP 21 hodi reforsa servisu iha tribunál sira
Jornalista : Natalino Costa
Editór : Florencio Miranda Ximenes

