Traballadór na’in-haat kansela ba Korea Súl tanba Covid-19
DILI, 17 outubru 2022 (TATOLI) — Diretór Diresaun Nasionál Empregu Exteriór (DNEE), Filomeno Soares, hateten traballadór timor-oan na’in-haat la konsege halo viajen ba Korea Súl tanba hetan moras Covid-19.
“Ita-nia traballadór timor-oan ne’ebé loloos horiseik halo viajen ba servisu iha Korea Súl ne’e hamutuk 124, maibé na’in haat la konsege ba tanba deteta moras COVID-19, entaun na’in 120 de’it ba”, Filomeno Soares, hateten iha nia knaar-fatin, Becora, Dili, segunda ne’e.
Traballadór na’in haat ne’ebé la konsege ba, nia parte husu traballadór na’in haat refere labele lakon vontade, maibé atu halo taratamentu ba moras hodi rekoopera nune’e bele hein filafali oportunidade tuir mai.
Tuir akordu Governu Timor-Leste no Korea Súl ba 2022 nian, haruka traballadór timor-oan sira ba servisu iha Korea Súl ne’e hamutuk 500, maibé númeru refere haruka liu ona.
“Hahú hosi janeiru to’o mai outubru traballadór timor-oan ne’ebé Governu haruka ona ba servisu iha Korea Súl ne’e hamutuk 1.047”, konklui..
Jornalista : Arminda Fonseca
Editór : Zezito Silva
