Dadus provizóriu: Populasaun Timor-Leste 1.329.806 partisipa ona sensus uma-kain
DILI, 18 outubru 2022 (TATOLI) — Ministériu Finansa liuhosi Diresaun Estatístika (MF-DGE, sigla portugés) tersa ne’e, fó sai dadus provizóriu kona-ba partisipasaun sensus populasaun no uma-kain 2022 iha Timor-Leste hamutuk 1.329.806.
“To’o ohin meudia ita-nia dadus provizóriu ba populasaun ne’ebé rejistu ona hamutuk 1.329.806 inklui uma-kain hamutuk 242.712, total mane 677.190, feto 652,560, ida ne’e inklui mós vizitór no família sira ne’ebé daudaun ne’e iha, hamutuk 18.126”, Diretór Jerál Estatístika no Prezidente Komisaun Tékniku ba Sensu Populasaun no Uma-Kain 2022, Elias dos Santos Ferreira, hateten iha Caicoli.
Tuir rezolusaun ne’ebé iha, sensus hahú iha 04 setembru to’o 05 outubru 2022 ba munisípiu 12 inklui Rejiaun Administrativa Espesiál Oé-Cusse Ambeno (RAEOA). maibé ba Dili foin hahú iha 07 setembru to’o 07 outubru 2022.
Nia dehan sensus ne’e loloos hotu ona maibé ekipa tékniku DGE haree katak iha uma-kain balu ne’ebé seidauk vizita liuliu iha Dili tanba ne’e mak MF-DGE forma ekipa Taksforce hamutuk 164 hodi bele ba hala’o entrevista ba uma-kain sira ne’ebé seidauk partisipa iha sensus.
“Ha’u hakarak informa katak sensus ne’e munisípiu lima mak ramata loos ona hanesan Rejiaun Administrativa Espesiál Oé-Cusse Ambeno (RAEOA), Ataúro, Aileu no Manufahi, Covalima maibé ami tau nafatin ekipa taskforce ida ka rua iha ne’ebá atu haree karik uma-kain balu mak seidauk partisipa karik bele partisipa”, Elias adianta.
Ekipa taskforce ne’ebé iha DGE halo estensaun ba loron sanulu, hahú hosi 17 outubru to’o 27 outubru, finaliza sensus uma-kain ne’e rasik, tarde liu novembru bele lansa ona rezultadu prelimináriu, nune’e halo diskusaun ba OJE 2023 ne’e bele haree ona dadus ne’e.
“Ita estende ba loron sanolu ne’e barak liu mak iha Baucau, Bobonaro no Ermera. Ba Dili rasik ne’e hela suku haat mak agora sei foti dadus, hanesan, Comoro, Madohi, Fatuhada no Vila-Verde tanba populasaun kada tinan aumenta”, nia dehan.
Orsamentu ne’ebé prepara ba estenasaun durante loron sanulu ne’e hamutuk $19.000.
“Ha’u husu ba populasaun sira ne’ebé hela iha área rurál karik seidauk hetan sensus karik hakbesik an ba sede suku sira hodi komunika ho ita-nia ekipa nune’e bele hetan sensus”, konklui.
Jornalista : Arminda Fonseca
Editór : Zezito Silva
