Guarda Florestál Sentrál presiza membru 200 hodi reforsa
DILI, 18 outubru 2022 (TATOLI) — Xefe Departamentu Korpu Guarda Florestá Sentrál, João dos Reis, presiza tan membru hamutuk 200 hodi reforsa servisu guarda floresta sira iha territóriu laran.
“Ita iha suku hamutuk 452 maibé ita-nia guarda florestál foin na’in 310, ida ne’e la sufisiente atu kontrola ita-nia floresta sira, nune’e ami presiza tan membru guarda floresta hamutuk 200 hodi kontrola di’ak liutan”, João dos Reis, hateten ba Agência Tatoli, iha nia knar-fatin, Caicoli, tersa ne’e.
Nia dehan, ko’alia kona-ba guarda florestál tenke tau rekursu umanu ne’ebé suficiente, nune’e bele kontrola riku-soin sira ne’ebé iha tanba ema kontinua halo atividade ilegál sira hanesan, tesi ai arbiru no kasa animál fuik sira.
“Área guarda florestál iha Timór-Leste rasik iha luan hamutuk ektare 869.000, maibé ho rekursu umanu ne’ebé daudaun ne’e limitadu ita tau membru sira ne’e haree liu ba suku sira ne’ebé alvu, ita-nia membru kada ema ida iha suku bele kontrola ektare 20, to’o 500″, subliña.
Aleinde rekursu umanu menu sira ne’ebé menus, iha mós falta transporte hanesan motór no ekipamentu sira ne’ebé atu fasilita membru sira atu halo atividade iha terrenu hanesan, rádiu lampara no seluk.
“Ita-nia membru sira ne’ebé uza transporte hanesan motór ne’e balu apoiu hosi Governu no parseiru internasionál maibé kondisaun motór ladi’ak hotu, balu prosesu ba leilaun no balu membru rasik mak hadi’a uza, maibé balu to’o agora transporte laiha entaun, ida ne’e difikulta tebes membru sira”, salienta.
Nia rekorda motór sira ne’ebé iha, sosa dezde 2004 to’o 2009 hamutuk 40 maibé daudaun ne’e hela de’it lima.
“Difikuldade sira ne’e ami hato’o ona ona ba parte relevante espera iha tinan ne’e ka tinan oin Governu bele tau prioridade” konklui.
Jornalista : Arminda Fonseca
Editór : Zezito Silva
