HNGV rejista pasiente baixa iha ICU 58 no óbitu na’in-22

DILI, 18 outubru 2022 (TATOLI)—Xefe Departamentu Medisina Intensiva Hospitál Nasionál Guidu Valadares, Vidál de Jesus Lopes, informa hahú agostu to’o setembru pasiente sira ne’ebé mak baixa iha Intensive Care Unit (ICU) na’in-58, hosi númeru ne’e na’in-22 mak mate.

“Iha agostu pasiente sira ne’ebé mak baixa iha ICU HNGV na’in-32 no mate 12 no iha setembru pasiente  baixa na’in-26  no lakon vida na’in-10,” hateten Xefe Departamentu  Medisina Intensiva ne’e  hateten ba jornalista sira iha HNGV, tersa ne’e.

Pasiente hirak ne’e maioria tinan 30 to’o 60 ne’ebé mai hosi sentru saúde sira iha Dili laran inklui hosi opsitál referál sira.

“Pasiente hirak ne’e baixa no mate tanba hetan asidente trafégu, moras fuan inklui stroke,” nia afirma.

Kona-ba ekipamentu no rekursu umanu, nia dehan sufisiente hela atu utiliza hodi halo atendimentu ba pasiente-sira iha ICU HNGV.

Jornalista : Felicidade Ximenes

Editór       : Florencio Miranda Ximenes