Janeiru-setembru BTL,E.P rekolla reseita $404,000 resin bá kofre Estadu
DILI, 18 outubru 2022 (TATOLI) – Bee Timor-Leste, Empreza Públika (BTL,E.P), hahú hosi janeiru to’o setembru 2022 hatama ona reseita ba kofre Estadu hamutuk $404.000 resin.
Prezidente BTL, Carlos Peloi, hateten reseita ne’ebé sira-nia parte hetan maihosi bee, sanementu inklui karreta ne’ebé sira fornese bee-moos ba komunidade.
“Hosi janeiru to’o mai setembru fulan kotuk servisu BTL nian ita konsege hetan reseita hamutuk $404.000, ida ne’e liu ona ami-nia tarjetu ne’ebé ba tinan ne’e, tanba ami-nia tarjetu ne’e $200,000 resin maibé agora liu, ami espera to’o dezembru ita bele halo to’o $500.000 ka $600.000”, Carlos Peloi, ba Agência Tatoli, iha nia knaar-fatin, Caicoli, tersa ne’e.
Aleinde BTL hetan reseita, sira mós halo poupansa ba orsamentu 2022 ho montante milaun tolu, hahú hosi janeiru to’o mai outubru.
“Tinan ida ne’e, ami konsege halo poupansa ba ezekusaun orsamentu ne’e hamutuk milliau $3, osan sira ne’e maihosi projetu sira ne’ebé ita halo hanesan kontratu ho empreza sira ne’ebé halo melloramentu ba sistema bee-moos no seluk tan sira servisu la halo tuir hanesan kuantidade sasan fornese la to’o, ka kualidade sasan ne’ebé fornese la to’o entaun ita redús sasan sira ne’e,” konklui.
Jornalista : Arminda Fonseca
Editór : Zezito Silva
