DILI, 20 outubru 2022 (TATOLI) — Ministériu Finansa liuhosi Diresaun Jerál Estatístika (DGE, sigla portugés) hamutuk ho Fundu Nasaun Unida ba Populasaun Timor-Leste (UNFPA-TL), selabra loron mundiál estatístika ho tema “Kualidade Data no Sustentabilidade Sosiál Ekonómia ba Dezenvolvimentu País nian”.
Diretór Jerál Estatístika, Elias dos Santos Ferreira, hateten selebrasaun loron mundiál ba estatístika ne’e, DGE hamutuk UNFPA-TL halo breafing ba mídia sira kona-ba progresu sensus populasaun no uma-kain 2022.
“Tema ba loron estatístika mundiál koalia kona-ba kualidade data no sustentabilidade sosiál ekonómia ba dezenvolvimentu país nian, ida ne’e impotatnte ba ita tanba tinan ne’e ita lansa kona-ba sensus populasaun uma-kain 2022 no loron hirak liuba ita lansa dadus provizóriu partisipasaun populasaun entaun ohin ne’e ita kontinua haree nia progresu”, Elias dos Santos Ferreira, hateten iha Caicoli, kinta ne’e.
Nia friza, dadus provizóriu kona-ba partisipasaun populasaun nian ne’ebé lansa ona loron hira liubá hamutuk 1.329.806, totál uma-kain hamutuk 242.712, mane totál 677.190 feto 652,560, ida ne’e inklui mós vizitór no família sira ne’ebé daudaun ne’e hela iha rai liur hamutuk 18.126.
“To’o horikalan tuku 22:00 dadus ne’ebé tama iha DGE iha totál populasaun ne’ebé partisipa ona iha sensus uma-kain 2022 ne’e hamutuk 1.338,54 ida ne’e konta mós ho ita-nia maluk sira ne’ebé iha liur hamutuk 18.504, no populasaun ne’ebé iha Timór laran rasik ne’e hamutuk 1.305.641, uma-kain”, konklui.
Jornalista : Arminda Fonseca
Editór : Zezito Silva
