DILI, 20 outubru 2022 (TATOLI) – Governu Timor-Leste kontinua ekoraja ba membru Persaudaraan Setia Hati Terrate (PSHT) atu kontinua kontribui ba pás no estabilidade iha rai laran.
Ministru Prezidente Konsellu Ministru (MPCM), Fidelis Manuel Leite Magalhães, hato’o asuntu ne’e bainhira halo abertura kongresu ordináriu ba dala haat iha salaun Lalini Larigutu, hodi hili estrutura foun.
“Governu tenke servisu hamutuk ho organizasaun oi-oin atu ajuda ka kontribui ba pás no estabilidade. Nune’e husu ba membru PSHT sira atu kontribui ba pás no estabilidade iha nasaun ne’e,” hateten Ministru Fidelis.
Governu nia intesaun reativa Organizasaun Arte Marsiál (GAM) atubele hametin seguransa nasionál liuhosi estabilidade no pás.
“Governu ho hanoin simple ne’e mak reativa Arte Marsiál iha nasaun ida ne’e, Nune’e membru ruma mak hahalok laloos tenke iha meiu ruma hodi haree sira, la’ós organizasaun tomak mak sai kulpadu,” nia afirma.
Tanba ne’e, Governante ne’e husu ba PSHT atu hatu’ur iha estatutu hodi refleta katak defeza da pátria ba membru PSHT sira. Tanba kualkér organizasaun sempre iha dezafiu iha uma-laran rasik.
“Ha’u lori Governu nia naran fó hanoin ba PSHT atu unidu iha uma laran liuliu maun bo’ot sira iha organizasaun tenke mantein unidade ba malu,” nia sujere.
Ho Nune’e, Ministru Fidelis fiar katak kongresu ne’e bele la’o susesu durante loron rua hodi kontribui dame ba estadu no nasaun.
Iha biban hanesan, Prezidente PSHT Timor-Leste, Baltazar Lemos Leixas, afirma kongresu ne’e hanesan programa anuál PSHT nian ne’ebé kada tinan lima hala’o hodi hili estrutura foun.
“Tinan ida ne’e, hanesan tinan ida ne’ebé livre no apoia hosi Governu hodi hala’o atividade hotu, nune’e agradese tebes ba Governu nia apoiu ba ita nia organizasaun ne’e,” nia agradese.
Tanba Governu nian apoia másimu mak iha fulan hirak ba kotuk, molok tama kongresu PSHT gradua ona membru hamutuk na’in-8000 iha territóriu nasionál.
“Ami nia organizasaun mós partisipa iha atividade barak ne’ebé Governu organiza, ami prontu apoiu atividade Governu nian hodi kontribui ba dezenvolvimentu nasaun nian, tanba doutrina PSHT nian atu hanorin ema sai ema no fiar ba Maromak mesak ida de’it,” akresenta.
Ho nune’e, nia hatutan hanesan sidadaun iha nasaun ne’e nafatin hakru’uk no hamtauk ba lei no hotu no husu ba membru hotu tenke tau interese komun nasaun nian aas liu hotu hodi kontribui ba pás no estabilidade.
Entretantu, Sekretáriu Jerál PSHT, Pedro Aparico reforsa tan katak, kongresu ne’e badala haat ona tanba kongresu primeiru hala’o iha tinan 2000, segundu kongresu 2009, terseiru kongresu extra-ordináriu iha 2021 tinan kotuk no ohin 2022 ba dala haat.
Nune’e nia mós husu ba membru sira atu hadia aan no muda hahalok aat sira durante ne’e hodi kontribui ba pás no estabilidade, nune’e bele hetan konfiansa másimu hosi Estadu.
“Hadi’a aan muda hahalok tanba durante tinan 13 organizasaun taka, simu hotu ema nia hanoin hodi hadi’a aan iha sosiedade no labele halo konflitu, atu nune’e bele hetan konfiansa hosi ita nia Estadu no komunidade,” dehan Pedro.
Kongersu durante loron rua iha loron daHuluk sei aprova rejimentu kongresu, aprova estatutu halo diskusaun, aprezenta relatóri hosi 2009-2022 no iha loron daruak sei hala’o eleisaun ba estrutura foun hodi lidera PSHT durante 2022-2026.
Kongresista hamutuk ema na’in 300-resin ne’ebé mai hosi Munisípiu 13 inklui Rejiaun Administrativu Oé-cusse Ambeno (RAEOA) no rayon sira iha Dili laran hahú A to’o F.
Orsamentu ba kongresu ne’e apoiu hosi doadór internál PSHT nian no kontribuisaun membru sira nian no seluk tan.
PSHT la harii partidu
Sekretáriu Jerál PSHT, Pedro Aparicio mós deklara abertamente ba públiku katak sira nia organizasaun sei la harii partidu hanesan organizasaun seluk tanba doutrina mak bandu atu harii partidu polítiku.
“Ami deklara ba públiku hotu katak ami sei la harii partidu, organizasaun ne’e hanesan desportu, maibé nia membru sira tama iha partidu politiku ne’e individu la lori organizasaun,” katak.
SekJen PSHT halo deklarasaun ne’e tanba durante ne’e GAM balun harii partidu no ema dehan PSHT mós sei harii partidu, nune’e halo klarifikasaun liuhosi deklarasaun aberta.
“PSHT la hare ba kór, relijiaun, tanba o atu islámiku mós PSHT simu, atu katóliku mós PSHT simu ka Kristaun mós PSHT simu o ka laiha relijiaun lmós tama iha PSHT ami nia odamatan nakloke”.
Durante ne’e ema barak julga PSHT ba jura iha bandeira Indonezia nian tuir nia ne’e lalos tanba PSHT halo juramentu ba Maromak tanba fiar Maromak mesak ida de’it, la’ós ba bandeira ema seluk nian.
Tuir dadaus ne’ebé iha PSHT daudaun ho nia membru hamutuk 90.000-resin iha territóriu nasionál.
Jornalista: Hortencio Sanchez
Editór : Florencio Miranda Ximenes
