La kumpre notifikasaun, MJ sobu obrigatóriu lutu iha rai Marconi

DILI, 20 outubru 2022 (TATOLI)— Ministériu Justisa (MJ) liuhosi Diresaun Jerál Terras no Propriadade, iha kinta (20/10) ne’e, sobu obrigatóriu lutu ka kalen ne’ebé didin iha rai Marconi, aldeia 05, suku Fatuhada, postu adminstrativu Dom-Aleixo, munisipiu Dili, tanba rai ne’e pertense ba Estadu-nian.
Asaun sobu obrigatóriu lutu ne’e bazeia ba despaisu husi Gabinte Ministériu Justisa, ho númeru 1192/DGTP/SEPT/X/2022 ne’ebé hatun ba Diresaun Jerál Terras Propriedade husu apoiu serbisu hosi Polísi Siéntifika Invetigasaun Kriminál (PCIC, sigla portugés) hodi apoia sobu obrigatóriu lutu iha área Marconi aldeia 05 ne’e.
Notísia relevante: Disputa rai Marconi, Governu fó prazu loron 30 ba okupante hapara atividade
“Iha kazu rai Marconi ne’e, okupante ne’ebé okupa rai estadu ne’e, la obedese ka la kumpre ba notifikasaun ikus ne’ebé Governu fó ho númeru 61. Ho razaun legál ne’e maka Ministériu Justisa deside sobu obrigatóriu kalén ka lutu ne’ebé didin iha área rai Marconi ka iha klínika 333 nia oin,” Diretór Jerál Sekretária Estadu Terras no Propriedade (SETP), Lucas António da Costa, hateten ba jornalista sira iha Marconi-Dili, kinta ne’e.

Tuir lei númeru 01/2003, hateten katak, rai ka propriedade ne’ebé mak identifika ona nu’udar rai Estadu nian, maka sidadaun sé deit mak hakarak okupa, Estadu sei notifika nia durante loron-tolu-nolu (30). Bainhira okupante ne’e nafatin la kumpre, estadu sei fó tán notifikasaun ho prazu tempu durante loron-sanulu (10).
MJ foti desizaun ne’e tanba tuir prosedimentu fó ona notifikasaun bá dahuluk, hosi parte okupante, maibé la kumpre no fó tán nofitifikasaun ikus ho prazu loron 10, maibé la kumpre mak deside sobu obrigatóriu.
“Okupante la kumpre nafatin, nune’e prazu liu ona, mak ita tuun direta ezekuta ordén governu hodi sobu obrigatóriu lutu ne’e tanba rai ne’e pertense bá Estadu”, katak.
Governu deside hasai obrigatóriu ne’e la tolera ona okupante sira atu bá harii fali tán lutu iha rai ne’e, maibé sente la kontente bele kontesta ka lori kazu ne’e bá tribunal.
Estatutu rai Marconi ne’e, Diretór ne’e dehan nia natureza propriedade Estadu nian, nune’e Estadu mak bele administra, katak sidadaun ne’ebé hakarak utuliza rai ne’e tenke halo arrendamentu ho Governu liuhosi MJ
“Sé de’it mak hakarak okupa, hakarak uza bá atividade negósiu, tenke ko’alia ho Estadu, para regularize liuhosi akordu arrendamentu,” katak.

Estatutu rai iha área Marconi ne’e pretense ba rai Estadu, tanba ne’e iha mandatu Sekretáriu Terra Propriadade Jaime Xavier halo kontratu arrendamentu ho kompañia ida atu uza rai Marconi ba fatin negósiu hahú tinan 2017 to’o 2022.
Nune’e, kontratu arrendamentu ne’ebé kompañia selebra ho governu ramata ona fulan-maiu 2022 no seidauk iha renovasaun kontratu ba fatin ne’ebá. Empreza selu arrendamentu fulan tolu de’it restu nia la selu hodi hamosu divida rihun $36-resin.
Rai Estadu iha Marconi ho metru 50 hosi tasi ibun ne’e pertense ba rai Estadu nian, nune’e laiha razaun ema ida atu hada’u katak ne’e rai privadu.
Entretantu, Jornalista TATOLI tenta konfirma ho advogadu okupante rai Marconi, Cancio Freitas via telefónika, maibé nia parte la atende.
Durante ekipa sobu lutu obrigatóriu iha Marconi, hetan akompanamentu hosi Komandante Eskuadra Dom-Aleixo, Inpestór Xefe Alexadrino da Costa ho Membru sira no mós PCIC. Enkuantu kalen ne’ebé okupante uza hodi didin ne’e Guarda Munisípiu Dili tula bá tau iha Munisípiu Dili.
Notísia relevante: Komunidade Marconi husu Governu buka solusaun ba disputa rai
Jornalista: Natalino Costa
Editór : Florencio Miranda Ximenes

