Heineken prosede semináriu ba estudante-sira kona-ba hemu ho responsabilidade
DILI, 21 outubru 2022 (TATOLI) — Kompañia Heineken Timor-Leste, sesta ne’e, kolabora ho Polísia Nasionál Timor-Leste (PNTL), liuhosi Departamentu Tránzitu, realiza semináriu ba estudante universidade sira iha Dili kona-ba oinsá hemu ho responsabilidade.
“Entaun atividade ohin ne’e parte hosi resposabilidade, ami halo programa ida ne’e atu hatan ba ami-nia pilár ne’ebé mak iha, entaun ita kolabora ho PNTL oinsá ita fó hanoin ba ita-nia estudante sira konsumu tua ho resposabilidade”, Filomena Filipe, hateten iha Timor Lodge.
Nia dehan, konsumu tua ho responsabilidade mak oinsá estudante sira hemu tua tenke haree nia regra tanba kompañia Heineken rasik iha nia tua lata sira sempre hakerek ema ne’ebé atu konsumu ne’e hahú hosi idade 18 ba leten.
“Maibé ita-nia rai ne’e survei ne’ebé ita halo ema barak ladún iha koñesementu labarik idade 18 tun mai kraik mós konsumu hotu, liuhosi semináriu sira ne’e oinsá fó hanoin ba sira nune’e bele fahe tutan ba família komunidade, vantajen no desvantajen hosi hemu tua”, nia hateten.
Iha fatin hanesan, Diretór Departamentu Tránzitu no Seguransa Rodaviáriu Nasionál, (DDTSR-PNTL) Asistente Superentidente, Albino Mauzino, hateten PNTL nia prezensa iha semináriu kona-ba estudante konsumu ho responsabilidade ne’e oinsá atu fó hanoin ba estudante sira impaktu konsumu alkohol no utiliza telemovél bainhira lori karreta ka motór.
“Tanba ita-nia regra sira ne’e estabele iha kódiku estrada númeru 6/2003 ne’e bandu tebes ema konsumu alkohol lori transporte públiku no resulta asidente”, nia hateten.
“Ita haree hosi númeru asidente ba tinan ida ne’e nian hahú hosi fulan janeiru to’o mai setemebru nia-laran totál kazu hamutuk 1.282, ne’e fahe ba kanek kmaan iha 1.301 kanek todan 258 no mate 68”, konklui.
Jornalista : Arminda Fonseca
Editór : Zezito Silva
