MS apoia fasilidade saúde ba HRO hodi reforsa atendimentu publiku

OÉ-CUSSE, 21 outubru 2022 (TATOLI) – Ministériu Saúde (MS) liuhosi Diresaun Nasionál Servisu Apoiu Hospitalar, sesta ne’e fornese fasilidade saúde ba Rejiaun Administrativa Espesiál Oé-Cusse Ambeno (RAEOA) hodi reforsa tán atendimentu publiku iha Hospital Referál Oé-Cusse (HRM).

Fasilidade hirak-ne’e komposta hosi ekipamentu médiku instrumentu, mobiliáriu hanesan kama ho tipu elétrika atu instala iha sala Unidade Kuidade Intensivu (ICU, sigla inglés), mákina anastéjia, lampra ba operasaun, ventiladór no instrumentu sirurjia.

Ekipamentu hirak-ne’e to’o Oé-Cusse simu direita hosi Prezidente Autoridade RAEOA, Arsénio Paixão Bano, hodi agradese ba Guvernu Sentrál tanba bele fornese fasilidade saúde ba Hospitál Referál Oé-Cusse.

“Fasilidade sira-ne’e esensiál no importante atu halo instalasaun ba sala operasaun sira iha ospitál Oé-Cusse, ita agradese tanba ita hein ekipamentu sira-ne’e kleur ona, ita mós agradese ba Ministériu Saúde tanba fasilidade to’o Oé-Cusse, tékniku sira kontinua halo instalasaun hodi fó atendimentu ba pasiente sira uza kedas, entaun ne’e orgullu boot mai ita, maske iha iha rejiaun maibé Governu Sentrál tau nafatin atensaun,” Arsénio Paixão Bano, informa ba jornalista sira hafoin remata identifikasaun ba fasilidade sira iha Hospital Referál Oé-Cusse.

Nia agradese ba dirijente saúde rejionál tanba ho esforsu koletiva, konsege hetan fasilidade ne’ebé adekuada mai to’o rejiaun, nune’e bele haforsa atendimentu públiku iha hospital Referál Oé-Cusse.

Administradora Hospital Referál Oé-Cusse, Catarina Anunu hatete, ekipamentu sira-ne’e to’o Oé-Cusse lori direita hosi ekipa nasionál liuhosi Diresaun Nasionál Servisu Apoiu Hospitalar nian, no kontinua halo kedas prosesu instalasaun, no fasilita mós formasaun ba tékniku sira iha Hospital Referál Oé-Cusse oinsá atu uza ekipamentu ne’e ho di’ak.

“Ita-nia ekipamentu durante iha ospitál sufisiénte, entaun ohin aumenta tan ida-ne’e, atu reforsa di’ak liután ita-nia serbisu liu-liu iha ospitál, ne’ebé ha’u agradese ba Ministériu Saúde liuhosi Diresaun Nasionál Servisu Apoiu Hospitalar, la haluha mós Oé-Cusse, ne’ebé ekipamentu sira-ne’e mai atu kompleta tan de’it fasilidade sira iha ospitál, nune’e ita bele fó atendimentu di’akliu tán ba pasiente sira iha Oé-Cusse,” nia orgullu.

Jornalista: Abílio Elo Nini
Editór: Evaristo Soares Martins