DILI, 24 outubru 2022 (TATOL)— Tribunál Distritál Dili (TDD) liuhosi Juis Singular Alvaro Maria, segunda (24/10) ne’e, deside aplika medida koasaun Termu Identidade Rezidénsia (TIR) no Aprezentasaun Periódika ba arguidu FFX, nu’udar Diretór Ajénsia New Generation.
TDD fó medida koasaun ne’e ba aguidu FFX, tanba tribunál haree katak faktu ne’ebé Ministériu Públiku aprezenta ba tribunál la komprova no la forte, signifika arguidu la envolve iha krime tráfiku umanu hanesan krime ne’ebé MP imputa ba arguidu.
Nótisia relevnate: MP alega prizaun preventiva ba Diretór ajénsia New Generation
Tribunál deside aplika medida koasaun TIR no Aprezentasaun Periódika ba arguidu atu aprezenta aan semana ida dala ida iha Eskuadra Polisia ne’ebé besik.
Hafoin rona tiha desizaun hosi Juis singulár Alvaro Maria, Defeza hosi Arguidu, Estaqui Guterres, hateten Tribunál liuhosi nia desizaun aplika TIR no Aprezentasaun Periódika ba nia kliente loos no adekuadu tanba faktu sira ne’ebé Ministériu Públiku aprezenta iha Primeiru Interrogatóriu ne’e la komprovadu no la forte.
“Ha’u aseita medida koasaun TIR no Aprezentasaun Periódika ne’ebé Tribunál aplika ba nia kliente no ha’u konsidera medida ne’e justu”, katak nia ba jornalista sira iha TDD.
Audénsia ne’e preside husi Juis Sigular Alvaro Maria, Ministériu Públiku reprezenta hosi Prokuradora Lidia Soares no arguidu hetan asisténsia legál hosi Defensór Públiku Estaqui Guterres.
Notísia relevante: Diretór ajénsia New Generation submete ba primeiru interrogatóriu
Ekipa konjunta detein Diretór ajénsia New Generation
Jornalista :Natalino Costa
Editór : Florencio Miranda Ximenes
