Aduaneiru RAEOA hatama reseita ba kofre Estadu rihun $55-resin
OÉ-CUSSE, 27 outubru 2022 (TATOLI) – Autoridade Aduaneiru (AA/Alfándega) iha Rejiaun Administrativa Espesiál Oé-Cusse Ambeno (RAEOA) rekolla reseita ba kofre Estadu iha trimestre datoluk, hahú hosi jullu to’o setembru hamutuk $55,427.75.
“Reseita iha Oé-Cusse, ne’ebé Alfándega rekolla liuhosi odamatan ida-de’it terrestre nian, ita-nia taxa la’o neineik la’ós hanesan uluk liubá kada tinan besik millaun ida, agora to’o ona trimestre datoluk foin to’o $55,427.75,” Diretór Alfandega Oé-Cusse, José da Costa, ko’alia iha Oé-Cusse, kinta ne’e.
Nia informa, momentu situasaun COVID-19, Governu autoriza kada semana dala ida, agora agradese tanba autoriza sasán tama kada loron, maibé barakliu maka nesesidade bázika hanesan cesta bázika nian no sasán konstrusaun nian, nune’e taxa hosi primeiru no segundu trimestre komesa sa’e neineik.
“Iha trimestre datoluk ne’e sa’e de’it rihun $1,500, ita kompara ho antes ne’e bo’otliu ida-ne’e, maibé agora la’o neineik, ida-ne’e maka kondisaun ita-nian, la’ós Alfayndega lakohi serbisu maibé komparasaun ho fronteira sira seluk, Oé-Cusse tún liu,” nia afirma.
Tuir nia, situasaun pandemia afeta tebes ba empreza sira atu halo importasaun barak ho tipu saida de’it, tanba aplikasaun estadu emerjénsia autoriza sasán semana ida tama dala-ida.
“Taxa ne’e la inklui portu no aeroportu só importasaun liuhosi fronteira terrestre hosi fronteira Sakato, ba Oésilo Pássabe no Nítibe dezde COVID-19 la ativa tanba kondisaun dalan,” nia katak
Nia fó-sai katak, fonte taxa ne’e kobre maioria importasaun nesesidade bázika no kontrusaun sivíl, ne’ebé tama diariamente, tanba dezde abríl to’o ohin Estadu autoriza importasaun tama kada loron.
“Ita fiar katak, to’o dezembru taxa sei sa’e maka’as, iha-ne’e só tabaku laiha autorizasaun, kuandu hahán no nesesidade báziku seluk bele, no sasán eletrónika, inklui konstrusaun nian,” nia afirma.
Entretantu, totál taxa ne’ebé Autoridade Aduaneiru RAEOA rekolla hahú hosi janeiru to’o setembru 2022, hamutuk $15.423.00. No totál funsionáriu ne’ebé servisu iha Autoridade Aduaneiru RAEOA hamutuk ema na’in-43, na’in-sia (9) permanente no kontratadu na’in-34.
Jornalista: Abílio Elo Nini
Editór: Evaristo Soares Martins
