OÉ-CUSSE, 27 outubru 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hamutuk ho Diretór Rejionál Operasaun Austrália no Country PT.Wartsila, Erwin Vanderkerff,, kinta ne’e hahú abertura formasaun kona-bá tékniku operadór mákina no distribuisaun iha Jakarta, Indonézia bá eletrisista sira hosi sentrál power-plant Inur Sakato Oé-Cusse.
Serimónia abertura formasaun ne’e realiza iha sentru formasaun PT.Wartsila iha Jakarta, Indonézia, ne’ebé hetan akompaña direita hosi Agreement Maneger empreza PT.PLN Pusdiklat Bogor, Indonézia, Muhamad Arsis Soulisa no jestór sentru formasaun PT. Warsila, Endang Kurniadi.
Iha serimónia abertura ne’e, Prezidente Autoridade RAEOA, Arsénio Paixão Bano, agradese ba empreza internasionál PT.Wartsila no PT.PLN Pusdiklat, tanba bele fasilita formasaun ba eletrisista sira hosi Oé-Cusse, atu garante kualidade atendimentu iha sentrál elétriku power-plant Inur Sakato ba futuru, bele mellora serbisu operasaun no distribuisaun nian.
“Ohin, ha’u abertura formasaun ba tékniku EDTL sira hosi Oé-Cusse atu hahú tuir formasaun kona-bá mékanika operasaun eletrisidade no distribuisaun nian, ne’ebé RAEOA agradese ba empreza internasionál rua ne’e tanba bele fasilita formasaun ba ita-nia tékniku sira, atu hasa’e tán koñesimentu, tanba o’e-Cusse daudaun ne’e eletrisidade kobre ona suku 18 inklui fatin izoladu sira no lakan 24 horas, entaun tékniku presiza atubele hadi’a liutan atendimentu,” Arsénio Paixão Bano, informa ba Agência Tatoli liuhosi whatsapp, hosi Jakarta Indonézia.
Autoridade ne’e afirma, formasaun mékanika ba operadór no eletrikál, hahú ohin ba ekipa dahuluk hamutuk ema na’in-sia sei tuir formasaun iha sentru formasaun Wartsila. Ekipa daruak sei mai tán iha novembru hamutuk ema na’in-ualu.
“Tékniku sira hosi Oé-Cusse sira-ne’ebé serbisu iha sentrál power-plant Inur Sakato sei mai hotu, atu kompleta formasaun, ida-ne’e nia objetivu atu mantein asegura eletrisidade iha RAEOA ba futuru nian, tanba daudaun ne’e ita sei hetan asisténsia hosi empreza Wartsila, maibé kuandu kontratu remata entaun ita-nia ema sira mós tenke preparadu,” nia afirma.
Xefe Departamentu EDTL Oé-Cusse, Armindo Mendonça, esplika, formasaun ne’e halo fazeadamente fahe ba dala-haat, faze dahuluk power-plant ema na’in-hitu, faze daruak ekipa distribuisaun ema na’in-lima, faze datoluk power-plant ema na’in-neen no ekipa ikus maka distribuisaun ema na’in-lima.
“Objetivu formasaun ne’e atu hasa’e kapasidade ba ita-nia funsionáriu sira, sei fokuliu ba melloramentu operasaun mákina no liña distribuisaun nian asuntu rua ne’e mak ita halo formasaun, tanba antes ne’e ita konsulta ona fatin ba Wartsila mak fasilita formasaun ba mákina hosi power-plant no PT.PLN Bogor fasilita formasaun ba liña distribuisaun nian,” Xefe Departamentu EDTL Oé-Cusse ne’e hateten.
Notiísia relevante: Arsénio Bano sei hala’o enkontru espesiál ho empreza Wartsila iha Jakarta
Jornalista: Abílio Elo Nini
Editór: Evaristo Soares Martins
