Xina oferese ekipamentu servisu ba PNTL
DILI, 28 outubru 2022 (TATOLI) –Governu Repúblika Populár Xina oferese ekipamentu servisu ba PNTL Xina liuhosi Embaixada iha Timor – Leste ofisialmente oferese ekipamentu servisu hanesan, boiña, stick, biti no solar painél ba Polisia Nasionál Timor – Leste (PNTL) hodi utiliza ba hala’o servisu.
“Agradese tebes ba Governu Xina nia apoia mai PNTLtanba ekipamentu hirak ne’e fasilita ami nia servisu,” dehan Komandante PNTL Komisariu Faustino da Costa iha Komandu Jerál Dili, sesta ne’e.
Xina oferese ekipamentu hanesan boiña hamutuk 2.000, biti kombate 1.000, stick 1.000 no solar painél 100.
“Sasan hirak ne’e membru utiliza de’it hodi halo servisu ba serbí povu no nasaun. Sasan hirak ne’e hodi suporta no ita utiliza ba bainhira tempu oportunu hala’o ita nia kna’ar iha baze liu-liu membru sira iha área rurál”, katak.
Komisariu Faustino dehan sei distribui solar painél ba postu Unidade Patrollamentu Fronteira (UPF) liu-liu postu sira ne’ebé seidauk asesu ba eletrisidade no distribui ba komandu sira iha Munisipiu ne’ebé seidauk asesu ba liña eletrisidade.
Nune’e, nia husu ba membru sira atu utiliza ekipamentu hirak ne’e ho responsabilidade no kuidadu atubele halo servisu ho profisionál.
Iha fatin hanesan, Embaxiadór Xina iha Timor – Leste, Xiao Jianguo, hateten apoia ne’e atu bele fasiilita no kapasita liutan servisu PNTL nian ho di’ak liután.
“Ami apoiu ba PNTL atubele kapasita sira nia servisu ho di’ak liután, apoia ida ne’e hanesan lasu ida hodi hametin ita nia relasaun entre nasaun rua atu sai belun di’ak liután”, nia reforsa.
Ho nune’e, iha tinan 2023 sira nia parte sei apoiu tan motorizada ba Unidade Tránzitu iha territóriu nasionál hodi bele halo servisu ho másimu.
Jornalista: Hortencio Sanchez
Editór : Florencio Miranda Ximenes
