DILI, 04 novembru 2022 (TATOLI)—Ministru Obra Públika (MOP), Abel Pires da Silva, aprezenta proposta iha reuniaun Konsellu Ministru (KM) estraordinária, ba projetu konstrusaun ponte foun ho estrutura metálika mota Comoro ulun (Kasnafar).
“Konsellu Ministru delibera ona atu fó autorizasaun ba prosedimentu aprovizionamentu ho tipu konkursu públiku internasionál no ba ninia despeza plurianuál ba obra públika projetu konstrusaun ponte foun, ho estrutura metálika mota Comoro ulun (Kasnafar), ho montante millaun $8,9,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha Palásiu Governu, sesta ne’e.
Notísia relevante: MOP asina ona kontratu ba morru protesaun mota Comoro to’o Kasnafar
Portavóz Governu dehan, KM delibera hodi autoriza prosedimentu nune’e bainhira loos ona maka bele pronúnsia empreza ne’ebé mak sai manan-na’in hodi ezekuta obra.
Antes ne’e, MOP asina ona kontratu ho empreza manán-na’in sira hodi halo konstrusaun ba morru protesaun hahú hosi Manleuana to’o mota Kasnafar inklui projetu tau aspalt ba estrada hosi Fatisi (bee tudak) to’o Sarlala.
Governu liuhosi MOP kontinua halo normalizasaun estragu iha kapitál Dili no munisípiu sira maibé fó liu prioridade ba estrada hosi Manleuana bá Kasnafar to’o Sarlala tanba populasaun barak utiliza estrada.
Jornalista : Antónia Gusmão
Editora : Julia Chatarina
