DILI, 04 novembru 2022 (TATOLI)–Governu prevee ona orsamentu hamutuk millaun $14,5 iha proposta Orsamentu Jerál Estadu (OJE) 2023 hodi sosa asaun operadór telekomunikasaun Timor Telecom.
“Governu atu sosa asaun Timor Telecom 21%, ho razaun ida katak Governu tenke iha partisipasaun másimu iha operadór telekomunikasaun ne’e tanba antes ne’e nu’udar asionista ona,” Diretór Jerál Planeamentu no Orsamentu, Ministériu Finansa, José Alexandre de Carvalho, hateten liuhosi programa entrevista eskluziva Agência Tatoli, iha Farol, sesta ne’e.
Nia dehan, Governu inisia ona dada fibra ótika hosi Darwin mai Timór atu nune’e bele aselera velosidade internet, enkuantu empreza sira ne’ebé fornese servisu internet maioria estranjeiru.
“Timor-Leste hola parte iha Timor Telecom maibé ho asaun kiik, tanba ne’e maka Governu hakarak sosa tan asaun iha ne’ebá hodi hasa’e tan ninia partisipasaun, nune’e bele iha influénsia foti desizaun iha Timor Telecom. Razaun ida mak atubele garantia ninia soberania rasik, se lae empreza estranjeiru sira mak monopoliza hotu telekomunikasaun,” nia akresenta.
Notísia relevante: Governu introdús medida 22 iha proposta OJE 2023
Aleinde ne’e, intensaun Governu atu sosa asaun maka atu gaña kontrolu iha operadór telekomunikasaun ne’e.
Timor Telecom maioria kontrola hosi Telekomunikasaun Públika Timor (TPT) SA, ne’ebé Oi Brazil ho kapitál 76%, partisipasaun SGPS 3,05%, Fundasaun Harii-Sosiedade ba Dezenvolvimentu Timor-Leste (Dioseze Baucau) 18% no Fundasaun Oriente 6%.
Daudaun partisipasaun iha Timor Telecom kompostu hosi TPT SA (54,01%), Estadu Timor-Leste (20,59%), VDT Holding Limited (17,86%), Júlio Alfaro (4,49%) no PT Participações SGPS SA (3,05%).
Timor Telecom eziste desde 17 outubru 2002, nu’udar sosiedade anónima dahuluk ne’ebé harii iha rai-laran, ne’ebé operadór telekomunikasaun ne’e fó ona serbisu ba timor-oan lubuk no fó apoiu ba atividade Governu no sosiál sira.
Iha loron 01 marsu 2003, Timor Telecom hahú hala’o operasaun iha Dili, Lospalos, Baucau no Oé-cusse.
Daudaun ne’e Timor Telecom harii ona torre hamutuk 266 ba 3G no 102 ba 4G iha territóriu nasionál, no tuir planu sei harii tan torre balun iha área rurál hodi fasilita povu Timor-Leste uza meiu komunikasaun ho di’ak.
Operadór telekomunikasaun ne’e daudaun rejista nia kliente hamutuk 700.000 resin no sira-ne’ebé uza simcard ativu iha 45.000.
Timor Telecom iha funsionáriu permanente hamutuk na’in-397, kompostu hosi mane 60% resin no feto 33%.
Jornalista : Antónia Gusmão
Editora : Julia Chatarina
