iklan

EKONOMIA, HEADLINE

Governu inisia kria grupu traballu atu regulariza pagamentu ba kontratu

Governu inisia kria grupu traballu atu regulariza pagamentu ba kontratu

Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, sesta (04/11). Imajen Tatoli/Egas CristóvãoPrimeiru-Ministru, Taur Matan Ruak, prezide reuniaun Konsellu Ministru, iha Palásiu Governu, sesta (04/11). Imajen Tatoli/Egas Cristóvão

DILI, 04 novembru 2022 (TATOLI)–Governu liuhosi reuniaun Konsellu Ministru (KM) estraordinária, sesta ne’e, aprova projetu rezolusaun Governu, ne’ebé aprezenta hosi Ministru Finansa, Rui Augusto Gomes, kona-ba kriasaun grupu traballu ba regularizasaun pagamentu iha ámbitu kontratu sira.

“Grupu traballu ida-ne’e ho misaun mak atu identifika kontratu sira ne’ebé ninia presu halo ona fatura maibé seidauk konklui pagamentu,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Notísia relevante: PR promulga dekretu-lei Rejime Juridiku Aprovizionamentu no kontratu Públiku

Nia dehan, hafoin halo identifikasaun ba kauza no kuantidade hirak ne’ebé atu selu, sei estuda posibilidade atu regulariza pagamentu no sei propoin iha prazu loron 60 atu fó solusaun lejizlativa atubele permite regulariza.

Grupu traballu ne’e prezide hosi reprezentante ida hosi membru Governu responsável ba área planu no ordenamentu, ne’ebé kompostu hosi reprezentante sira hosi membru Governu ida-idak ho asentu iha Konsellu Administrasaun Fundu Infraestrutura no hosi membru Governu seluk ho responsabilidade ba matéria.

“Karik grupu traballu ne’e presiza, sira bele konvida reprezentante hosi entidade públika sira seluk atu partisipa iha sorumutuk sira,” nia tenik.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!