iklan

EDUKASAUN, HEADLINE

Estudante finalista 44 tuir ezame segundu xamada

Estudante finalista 44 tuir ezame segundu xamada

Ilustrasaun ezame. Imajen/Espesiál

DILI, 07 novembru 2022 (TATOLI)–Estudante finalista 44 ne’ebé auzénsia durante ezame nasionál foin lalais no lakon oportunidade partisipa ezame, kontinua filafali ezame segundu xamada iha ida-idak ninia munisípiu.

Tuir dadus, estudante 44 ne’ebé auzénsia mai hosi munisípiu Dili, Baucau, Manufahi, Viqueque no Covalima.

“Estudante 12 agora hala’o hela ezame segundu xamada. Sira hetan oportunidade tanba antes ne’e parte eskola hatene hela sira-nia novidade. Tanba ne’e sira bele tuir filafali oportunidade iha segundu xamada,” Diretór Servisu Munisipál Edukasaun Baucau, Augusto Ornai Ximenes, informa ba Agência Tatoli, via telefónika, segunda ne’e.

Notísia relevante: Estudante finalista Viqueque na’in-11 la partisipa ezame nasionál

Estudante auzénsia iha munisípiu Baucau loloos iha 53, kompostu hosi mane 22 no feto 30, maibé iha estudante 40 maka konsidera la hetan oportunidade atu tuir ezame segundu xamada tanba antes ne’e eskola la simu informasaun kona-ba estudante sira.

“Ita konsidera estudante 40 iha Baucau lakon sira-nia direitu tanba sira la pasa informasaun mai eskola kona-ba sira-nia paradeiru, tanba ne’e ita la fó oportunidade daruak atu tuir filafali ezame,” nia akresenta.

Nune’e mós, Diretór Servisu Edukasaun munisípiu Dili, Carlito da Silva, hateten, estudante 25 maka tuir ona ezame segundu xamada maibé dadus ne’e sei provizóriu tanba estudante barak maka seidauk partisipa iha ezame segundu xamada.

“Ohin ha’u ba akompaña estudante sira auzénsia ne’e no ha’u haree sira na’in-25 mak tuir ona ezame. Balun edukasaun haruka filafali tanba mai tarde balun hatais fali roupa baibain no balun haluha kartaun, entaun aban maka sira foin mai tuir hotu,” nia haktuir.

Daudaun hosi munisípiu Manufahi iha estudante tolu maka auzénsia, Covalima rua, Aileu ida no Viqueque tolu.

Koordenadór Unidade Kurríkulu Nasionál, Mateus dos Reis, deklara, depois ezame nasionál segundu xamada hotu ona maka iha semana ne’e fó sai rezultadu ba públiku kona-ba totál estudante ne’ebé partisipa no la partisipa ezame iha tinan ne’e.

Jornalista   : Tome Amado

Editora        : Julia Chatarina

iklan
iklan

Leave a Reply

iklan
error: Content is protected !!