DILI, 07 novembru 2022 (TATOLI) – Federasaun Futeból Timor – Leste (FFTL) halo ona pagamentu ba saláriu treinadór no jogadór selesaun nasionál ne’ebé durante ba partisipa jogu internasionál.
“FFTL Halo ona pagamentu ba saláriu jogadóre no treinadór sira hahú hosi selesaun Seniór, Feto no Mane, U-19 ba kompetisaun AFF, U-20 ba kompetisaun AFC no U-16 ba kompetisaun AFF. Pagamentu ne’e hahú hala’o ohin no sei kompleta iha kuarta semana ne’e”, dehan Diretora Finansa FFTL, Solange Borges, ba Agência TATOLI iha Dili, segunda ne’e.
Ho polémika ne’ebé mak durante ne’e la’o iha públiku hosi hadomi na’in futeból Timor-Leste, mak FFTL ho esforsu másimu konsege rezolve daudaun ona preokupasaun jogadór no treinadór ba saláriu hosi kada kategoria.
“FFTL liuhosi Diresaun Finansa hahú halo pagamentu ba Selesaun Seniór ba kompetisaun AFF Suzuki Cup 2020, Sea Games 2021 no mós jogu amigavél kontra Nepal, Camboja no Filipina. Ba pagamentu hirak seluk, sei kompleta iha loron rua tuir mai. Pagamentu ne’e inklui mós saláriu ba Ex-Treinadór prinsipal Fabio Maciel no Treinador Fiziku Silas Paixão,” nia afirma.
Ho nune’e, FFTL informa ba públiku hadomi na’in futeból katak fonte hosi fundu ne’e mai husi doadór prinsipál FFTL nian mak FIFA no AFC.
“Ita liu hosi prosesu lubun ida, fundu ne’e hetan aprovasaun husi FIFA no AFC iha semana ikus outubru, nune’e hahú ohin ita halo pagamentu,” katak.
Totál orsamentu ne’ebé FFTL halo pagamentu ba jogadór no treinadór hamutuk $150.000 ba jogadór no treinadór ne’ebé sai benefisiariu liu ema na’in-100-resin.
Notísia relevante: TL derrota ho Brunei, SEJD konsidera normál iha futeból
Jornalista: Hortencio Sanchez
Editór : Florencio Miranda Ximenes
