Pasiente ISPA no diareia domina iha SSM Manatuto
DILI, 08 novembru 2022 (TATOLI)—Diretór Servisu Saúde Munisípiu Manatuto, Mateus Vicente Correia,informa hahú husi agostu to’o outubru pasiente Infesaun Vias Respiratóriu (ISPA) no diareia domina iha Munisípiu Manatuto.
“Husi fulan agostu too outubru ne’e kazu Infesaun Vias Respiratoriu (ISPA) no diareia maka’as iha munisípiu Manatuto liuliu ba labarik sira ne’ebé idade tinan lima mai kraik mak afeta barak”, hateten Diretór ne’e ba Agência TATOLI via telefónika, tersa ne’e.
Tuir nia labarik sira ne’ebé afeta ba kazu diareia tanba tempu udan ai-fuan sira barak entaun han la kontrola bele kauza ba kabun moras.
“Kada fulan ISPA afeta ba labarik kuaze 200 resin iha Manatuto, maibé bainhira sira ba fasilidade saúde mak médiku sira halo atendimentu to’o sira rekupera fila ba uma”, nia afirma.
ISPA nia kauza mai husi anin liuliu situasaun natureza, udan derepente monu rai halo rai iis no labaraik sira moras hotu no dalabarak inan aman sira ladun tau importánsia ba oan sira hanesan halimar rai rahun.
“Dalabarak inan aman la kontrola oan sira atu haris no han la fase liman bele afeta ba moras ISPA no diáreia”.
Nune’e, nia husu ba ina-aman sira kontrola oan-sira atu han ai-han nutritivu, moos no hamoos uma laran no labarik sira tenke haris bee moos loron ida dala tolu.
Kona-ba ekipamentu médiku no medikamentu, nia deha sufisiente atu pesoál saúde sira uza halo atendimentu ba pasiente sira.
Jornalista : Felicidade Ximenes
Editór : Florencio Miranda Ximenes
