iklan

EDUKASAUN, HEADLINE, MUNISÍPIU, OÉ-CUSSE (RAEOA)

RAEOA haruka tán eletrisista neen ba tuir formasaun iha Jakarta

RAEOA haruka tán eletrisista neen ba tuir formasaun iha Jakarta

Autoridade RAEOA dezloka tán eletrisista neen hasa'e koñesimentu iha Jakarta. Imajen Tatoli/ Abílio Elo Nini.

OÉ-CUSSE, 08 novembru 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, tersa ne’e dezloka tán funsionáriu tékniku hosi Departamentu Eletrisidade Timor-Leste (EDTL) hosi Oé-Cusse hamutuk na’in-neen atu ba tuir formasaun iha Jakarta kona-bá matéria no prátika tékniku nian hanesan operasaun mákina, manutensaun ba mekánika, no manutensaun ba elétrika.

“Ha’u kontente tebes ekipa ida kompleta ona, ohin ita dezloka tán ekipa daruak atu ba hasa’e sira-nia koñesimentu, ne’ebé ha’u husu uza didi’ak oportunidade ne’e atu ba aprende, fila-fali mai tanba ita-nia eletrisidade iha Oé-Cusse presiza ema profisionál iha koñesimentu tanba iha futuru tékniku sira-ne’e maka sei responsabiliza másimu iha sentrál power-plant Inur Sakato,” Arsénio Paixão Bano informa hafoin despede eletrisista sira iha Gabinete ZEESM, Oé-Cusse.

Responsável ekipa tékniku no planeiamentu iha departementu EDTL Oé-Cusse, José Alexandre Bana, informa, funsionáriu tékniku EDTL na’in-neen ne’ebé dezloka iha faze daruak komposta hosi tékniku eletrikál manutensaun na’in-rua, no na’in-haat nu’udar tékniku operasaun ba mekánika hosi sentrál power-plant Inur Sakato.

“Ohin sira viajen toba iha Kupang, aban kuarta 09 novembru kontinua ba Jakarta, no iha kinta loron 10 novembru hahú formasaun durante semana ida, sei termina iha 18 novembru, no iha 19 novembru sei fila mai iha Kupang iha 20 novembru to’o Oé-Cusse,” nia informa.

Responsável ne’e fó-sai katak, fatin ba formasaun ne’e realiza iha sentru formasaun empreza internasionál PT.Wartsila no sentru formasaun empreza internasionál PT. PLN Pusdiklat Bogor iha Jakarta, Indonézia.

Nune’e alvu ba formandu sira mai hosi funsionáriu tékniku EDTL Oé-Cusse hamutuk na’in-32, ne’ebé tuir formasaun fazeadamente, daudaun ne’e ekipa ida kompleta ona formasaun falta ekipa daruak, ekipa datolu no ekipa ikusliu nian.

“Ita-nia formasaun ne’e nia objetivu primeiru maka atu hasa’e koñesimentu tanba mudansa globalizasaun entaun ita uza oportunidade ne’e atu fasilita formasaun ba funsionáriu tékniku sira, nune’e iha futuru bele mellora serbisu di’akliu tán iha Oé-Cusse, tanba daudaun ne’e ahi lakan 14 oras tama ona to’o bairru izoladu sira, entaun ita-nia rekursu umanu tenke preparadu hodi asegura no fó asisténsia másimu,” nia afirma.

Entretantu, formasaun ne’e hahú iha 27 novembru 2022, ne’ebé abertura direitamente hosi Prezidente Autoridade RAEOA, Arsénio Paixão Bano hamutuk ho Diretór Rejionál Operasaun Australia no Ázia Pasífiku nu’udar mós country empreza Internasionál PT.Wartsila, Erwin Vanderkerff.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!